藍莓椰撻

2012年11月22日下午1:38公開累積瀏覽 290 1                    

November 18, 2012, Sunday Afternoon

食晚飯前有的空檔, 二哥教我整椰撻, 佢仲帶埋的藍梅乾嚟, 整藍梅椰撻.  呢的藍梅喺佢加拿大後園種架.  收成時部份入冰櫃, 部份就哂乾. 收到的自家種嘅藍梅乾, 梗係開心啦.

不過二哥話佢整椰撻係無recipe, 每次都係用經驗同目測, 唔識講每樣嘅份量要幾多, 但阿嫂話次次都整得好好架.   咁二哥口述由我嚟做, 順便寫埋的份量, 同大家分享.

3隻雞蛋, 我剛從雪櫃攞出嚟, 二哥叫我用熱水浸暖隻蛋.   如果的蛋係室溫, 咁就唔使浸熱水


溶牛油30g

預備咗12個撻皮, 呢的撻皮都係二哥送比我架.  用溶牛油掃上撻皮

剩番嘅溶牛油留喺碗入面, 加蛋打勻, 加70g糖, 加125g椰絲, 全部拌勻. 令到的蛋醬"杰"的.  二哥叫我試味, 幾好喎, 唔會好甜.

最後加的藍梅拌勻.  二哥話加紅莓乾都一樣咁好味架.

將椰漿加入撻皮內

預熱焗爐200c

焗10分鐘, 調低至180c, 焗15-20分鐘, 睇爐火啦.  二哥話要焗到有少少燶先好味架.

出爐啦, 好香呀!


個面有少少香香地, 好正呀!

其實就嚟食飯架啦, 但係實在好香, 型爸, 二公子同我都忍唔著, 要即刻食番個.  嚟個飯前甜品.


咬落去, 好好味呀, 我好鍾意食椰撻架.....

唔掂啦唔掂啦, 呢個一定會常整呀!   咁咪會好肥.... 不過的料都唔係好肥啫....的椰絲唔係有益嘅咩...嘻嘻, 開始為自己搵定藉口啦.