過節

Jun 19, 2018, Monday

唔知點解個個節日都要返奶奶屋企做節, 但端午節就唔使.   咁仲好, 我地可以安排節目.

 端午節梗係要食糭應吓節啦.  今年的糭大部份都係人地送, 組長送咗兩隻, 呢兩隻係同事媽媽包的.   另一位同事又一隻比我, 我又幫街市婆仔買兩隻, 整整吓都有好多隻.

今日午餐就食糭再飲埋昨天的雞燉翅湯....咦, 的螺片可以用XO 醬炒埋嚟食都得喎. 

二公子話今晚去睇戲, 訂咗七點四票, 在MCL 逸峰....咁就要早的出去食個早飯, 因為粉嶺逸峰自從戲院開咗之後, 停車場成日排長籠, 到時等唔到位就麻煩啦.

五點五十分去到逸峰, 停車場唔使等位, 哈哈, 點知去到薩莉亞竟然要等位....唔係阿麻, 哈哈, 究竟係飲下午茶定食晚飯呢!

我地等到六點先有位....一入去, 原來入面嘅座位六點先開放, 可能唔夠人手呀!

二公子同型爸負責點餐, 我地四位, 點了好多野食.

白湯紅湯都有叫, 價錢雖說平, 但味道都唔錯呀!

三文魚生菜沙律

蘑菇雞肉芝士pizza

牛油蒜蓉焗田螺

要了一古芝士包, 一客蒜蓉包

芝士焗菠菜

芝士煙肉長通粉....二公子係芝士控, 咩都叫芝士

雞翼

炸蝦小食

價錢真係好平....未叫完呀....跟著要多個西冷牛扒, 都只係HK$69...咁當然唔係咩野靚牛扒啦, 但咁嘅價錢, 唔好預期的咩啦.

食完晚飯都只係七點, 仲有時間行吓企吓先去睇戲呀!

今日睇Jurassic World : the fallen Kingdom....幾好睇呀!   最好就係上星期六無線明珠台播完上集, refresh 咗的memory.

睇完呢套, 又要等續集....的恐龍走哂出嚟, 咁點攪呀!    仲有"人做人"小妹妹......