唔買唔買, 結果都係要買...
我係話砂鍋煲仔呀! 呢個煲話耐凍-20C至加熱+400c, 應該唔會咁易裂啩. 之前用鑄鐵鍋煮咗兩次鍋仔飯, 覺得的飯煲出嚟好似無瓦煲咁香, 所以唔抵得又買一個瓦煲嚟煮煲仔飯.
唔止買過個煲, 呢的米係响國內大型超市嘅散裝水晶貢米, 我見到粒粒長形, 好靚, 買的返嚟煮煲仔飯. 我從來都未試過買散裝米, 都係第一次呀!
雞斬件, 用鹽, 胡椒粉, 薑汁酒略醃
一杯米洗淨加一杯水拌勻浸10分鐘
用中火煮滾至飯煙企
呢, 見到的飯一個個孔咁, 我就放兩條鵝肝腸落去... 的米好香呀!
再加的雞上飯面
加蓋繼續煮10分鐘
咦, 仲未收乾水, 再煮多幾分鐘, 熄火焗10分鐘
跟著打開蓋加的蔥粒...將飯用勺全部撈勻...個煲仲好熱, 好似將的飯同雞一齊炒咁, 的味道香到不得了, 連Loki本來响戶外嘆緊冷空氣都即刻走入嚟睇吓有咩食.
嘩! 真係好香, 今次煮時無去雞皮, 的飯有雞油, 加埋的蔥超香. 不過食時就唔敢食雞皮啦. 的飯可以再焗乾身一的, 但而家都ok, 哎落啱啱好, 唔會"爛", 亦都無生米. 煮咗煲仔飯豉油, 但唔落的飯已經好好味.
我同型爸兩個人食哂煲飯, 連飯焦都清埋呀!
下次要煮兩杯米先得啦... 個煲無裂, 使得喎, 下次可以繼續用瓦煲嚟煲, 的飯真係香好多呀!
沒有留言:
張貼留言