就係呢個飛利浦出嘅免油炸鍋
最吸引係話可以最多減少80%脂肪, 成日都會炸野, 好想試吓呀....咁就用咗HK$1,498
外型幾好, 不過都幾大嚿
個炸鍋好容易拉出, 只要將紅色紙撕開, 一按藍色制, 個炸籃就會用底坐分離. 所以一定要將底坐放在檯面上先可按制, 如果唔係成個底坐會跌落地下
呢個就係個炸籃
呢個就係個底坐
配件仲有呢件分隔片
可以分隔兩款食物一齊炸
另外再送多一個焗鍋, 可以用嚟烹調有汁/水食物及用嚟焗蛋糕 (唓,要焗蛋糕都用焗爐啦)
呢個Airfryer 話焗急凍薯條唔使加油, 我梗係要試吓
包裝急凍薯條
唔使解凍, 倒入炸籃, 按時間制焗20分鍾
其中拉出嚟shake兩次, (我每5分鐘shake一次)
我第一次試16分鐘, 型爸二公子話可以焗脆小小, 我再放入去焗多4分鐘.
食時加的黑胡椒鹽... 呢籃已經係第二round嚟啦.
食落好脆口, 整起都幾方便, 但係同平時食嘅焗薯條係有分別架, 無咗平時用油炸嘅油香, 但咬落去就無油膩的感覺, 好似放心好多. 自己心中想要咩就要取捨啦.
既然買咗返嚟, 下次就試吓炸魚同春卷. 有的食物需要在面上塗上薄油再放入去炸, 咁點都好過用好多油去咋吖.
沒有留言:
張貼留言