良友快餐

Jun 8, 2017, Thursday

尖沙咀好多茶餐廳快餐店, 好多時午市午餐都係供應碟頭飯,小菜炒得好嘅真係無咩邊幾間.  今日介紹呢間良友快餐某幾款小菜炒得好不過白飯的質感對我嚟講就差咗的.

嚟呢道食過幾次, 但無經常幫襯係因為坐位迫夾, 唔係咁舒服.  不過尖東半島中心入面幾間食肆, 基本上間間的坐位都咁上下迫, 四十幾文個餐, 有杯飲品, 嚟得幫襯就唔好咁多支支左左, 咦咦哦哦.

呢道一落完單就要馬上比錢. 麻煩鬼話唔share, 各叫各啦....哈, 唔通佢又叫炒粉麵

 
飲品先上

哈, 麻煩鬼睇咗好耐唔知叫咩, 估唔到佢要了芙蓉炒蛋  (後來佢睇清楚先話叫錯, 應該要豉椒排骨炒河)

慢魔魔要了沙薑雞.  呢道嘅沙薑雞有的特吃, 應該係的雞整好哂斬好, 要沙薑雞就用沙薑汁回鑊, 如果要蔥油雞就用蔥油回鑊.  的雞都算多, 慢魔麼話都幾好味

我就要了沙嗲牛肉炒芥蘭, 我覺得炒得唔錯呀, 不過的飯有的粗糙囉.

其實呢道嘅煎肉餅好好味, 但要我一個淨食兩塊大肉餅我攪唔掂呀!  呢道的咕嚕肉睇落都唔錯, 我見好多人叫, 我下次會試吓.

HK$44一份餐, 凍飲加HK$2, 好多人幫襯.