薑蔥蒸花尾躉翅

April 5, 2014, Saturday

今日去買餸, 去咗兩個街市, 由香港仔返過嚟, 先去大埔墟剩市買咗大部份, 但搵唔到龍躉. 跟著再開車去上水街市, 嗰道一定有得賣.

 

果然無失望, 真係有得賣, 七文一兩.  呢道HK$128, 斤幾呀!

買嗰時有另一個婆娑响道買, 不過佢要淨肉, 唔要有骨.   佢話的背旗連骨好重稱, 全部都係七文一兩, 啖啖用抵食的.  但型爸要食背旗, 我都係鍾意有骨落檯, 都係揀番背旗, 魚檔阿姐話, 呢部份係貴的架.   當阿姐幫我打鱗時, 另一位太太又買, 不過佢又係買淨肉喎....唔通淨肉真係好抵?

 

 蒸魚就最簡單, 未炒其他餸前, 先放入去蒸爐蒸, 炒好其他兩碟餸, 的魚就啱啱蒸好. 跟著再灑蔥花再灒豉油熟油就得啦.

一食落去就知無買錯部位, 我地就係要呢的近骨好滑嘅部位, 的皮厚厚, 哎落去有少少彈牙, 骨膠原呀!

因為係背旗, 所以每一嚿都連骨連皮.   相比起, 的肉雖然好味, 但邊有的皮連骨咁好味呀!

型爸又比like 啦.

今晚呢餐餸, 我有三個like 呀!

薑蔥炒鮑魚

西芹炒雞什

 

仲有粟米紅蘿蔔薯仔豬骨湯, 超甜呀!

 
三餸一湯, 兩個人撐檯腳, 豐富又超正啦!

型爸一早車出車入等我兩個鐘整頭髮, 梗係要煮的佢鍾意食嘅氹吓佢啦.

食完晚飯, 我地又有酒聚呀! 晚上九點响八號屋舉行 

我同型爸先到, 帶備豬肉紙, 魚乾, 花生做送酒小食

仲帶埋枝竹鶴21年, 不過唔使開, 八號屋叫我地飲埋枝開咗嘅Macallian先

男士飲Whisky, 女士飲紅酒

 

到人齊時就仲多小食, 我地五家人, 每家帶一的, 多到食唔哂.

大家傾傾講講又到午夜, Saturday night, 明天唔使返工, 夜的都無問題啦.

西芹炒雞什

April 5, 2014, Saturday

當我同型爸去買餸時, 型爸突然話佢要食雞什, 仲即刻出去外面新鮮雞檔睇吓有無得賣.

結果比佢買到, 仲好大份, 都只係HK$25.   有雞腸雞肝雞心雞腎.  

呢, 就係咁大份, Ruby幫我洗乾淨, 再汆水

買咗一大棵西芹, 兩個人, 食一半夠啦.  刨絲切條

為咗方便快炒,先將西芹焯幾分鐘, 中式小炒, 如果的西芹太硬唔好食.

預先用豉油豆粉糖加水調茨汁

用蒜蓉加薑片起鑊

將雞什落鑊爆一爆

加西芹

加入茨汁, 因雞什同西芹都焯過,不需煮太耐, 只要快炒幾下就ok.

西芹炒雞什就攪掂, 好香呀!   我的蒸魚未攞出嚟, 型爸已經開始食啦.

呢碟如果出街食, 應該要HK$98至HK$128, 仲無我咁多雞什咁多西芹(一半都唔知有無), 我而家HK$30大大碟呀!

型爸又比多個like啦.

薑蔥炒鮑魚

April 5, 2014, Saturday

整完頭髮, 同型爸拍拖去買餸, 型爸咁好, 今晚整餐好嘅佢食.

去到街市, 賣鮑魚的婆婆係咁sell我, 平的比賣比我.   呢兜五十文, 好啦好啦, 又幾抵.  今晚得兩個人食, 有七隻, 夠哂啦.

買到返屋企, 我見Ruby係咁意用水沖吓.    呢的開鮑魚工作, 一定要自己嚟

不過都好容啫, 用刀仔插入鮑邊, 在底部界幾吓就得, 好快界哂出嚟

跟著就用生粉粗鹽洗吓, 再用牙擦擦乾淨

睇吓洗完幾乾淨, 同買番嚟時差幾遠.  所以好多時去流浮山鯉魚門西貢食海鮮, 我都有的怕佢地洗唔乾淨的鮑魚.

界好花

預備的薑蔥...的蔥唔夠多添.   再用豉油豆粉糖調定一個茨汁

跟著將的鮑魚放滾落水焯一分鐘.   其實都唔知有無一分鐘, 見到的鮑微微彎起我就即撈起

呢, 就係咁啦.

跟著用蒜蓉起鑊, 加薑片爆香

 

加蔥再爆

加鮑魚炒兩吓

可茨汁,煮起兜幾下就可以.   唔需要煮好耐, 唔係的鮑魚會硬哂.

上碟.


睇吓個樣幾正

咬落一樣咁正.   型爸食完一隻, 即刻比個like我.

其實鮑魚本身無咩味, 加咗薑蔥同茨汁就好好味啦.

激辛芥末魚堡

April 5, 2014, Saturday, 清明節

呢排都係忙忙, 上兩星期分別提早去掃墓, 今日就唔需要再去迫啦.  其實有的人早的去, 有的人正去, 又有的人遲的掃墓, 咁都好嘅, 分開的人流, 交通唔使咁擠塞.

好耐都整理吓三千煩惱, 趁今日去攪攪佢.   要去到香港仔呀, 因為相熟兼朋友髮型師, 鋪頭開响嗰區, 要幫襯就要去咁遠.

哈哈, 今日情商私人柴可夫司機接送, 咁就唔會覺得好遠啦.

為咗感謝佢, 我請佢去麥當勞呀!

其實係我睇見電視賣廣, 講到個激辛芥末魚堡好似好好味咁, 我想試吓呀!  (上次食麥當勞, 好似係去年嘅黑白漢堡)

咁型爸做司機, 我梗係要慰勞吓佢, 佢話要雙層黑椒漢堡, 即係買比佢, HK$36.9 一個套餐
仍打開個包比我睇, 好多黑椒汁喎.... 我無咬佢一啖呀!

佢就慢慢堂食.

我就買咗個芥末魚堡套餐( HK$29.60)上去髮型屋食, 慳的時間麻.

呢, 個芥末魚堡係咁

打開, 好少生菜, 好少醬汁, 同電視睇嘅係絕對唔一樣.

食落, 當然都唔係好似賣廣告咁滋味啦.   一的都唔激辛, 真係一的辛都無(佢有無犯咗產品說明條例呢?)   食落咪即係加咗芝士嘅魚柳包囉.   咁唔難食嘅, 如果佢地比多的醬汁, 應該會好好多.

多謝型爸,周圍逛等咗我兩個鐘....型爸, 你是最好的!

The New Sangeet Indian Restaurant

April 4, 2014, Friday afternoon

呢排出去食午餐,同同事數吓我地有幾多間飯堂, 數數吓真係無咩幾多間.

一號 : 新森林焗之專門店
二號 : 新曼谷餐廳
三號 : 龍門酒家
四號 : 馬家莊清真館
五號 : 海鮮站
六號 : 阿善素食館(自從上次佢地比碗唔熱嘅栗米粥, 都唔想去食啦)
七號 : 板長壽司(麻煩同事又唔係好想去, 佢唔食牛又唔想食魚, 話無咩選擇)
八號 : 金田日本料理 (去過幾次, 呢輪都覺得唔係幾啱食)
九號 : 譚仔米線 (要等飯桶同事唔一齊先可以去, 因為佢一定要食飯)
十號 : H8其他食群
十一 : 美心快餐 (好久唔久先去一次)
十二 : 酒樓飲茶, (又係好久唔久先去一次)

數嚟數去, 都無尖東嘅餐廳, 今日突然醒起, 仲有一間印度餐廳好耐都無去, 應該有半年啩.

就係呢間The New Sangeet, 喺尖東廣埸, 以前都去過好幾次, 今日飯桶同事唔等閒, 我同另一位同事去.  飯桶同事唔like咖哩, 佢話對的辣敏感喎.

半年無嚟過, 午餐加咗少少價啦.

Lunch Buffet 都好似加咗HK$10, 不過都唔諗著食, 因為實在太飽

今日唔多客, 去到即有位 (通常都唔使等位)

要了午餐, 先嚟薄脆

呢個湯飲落似栗米雞湯, 但係入面又無雞.   好重胡椒味, 又唔似素湯

同事要了凍檸茶, 我要熱奶茶, 餐後上

每人一嚿烤雞及咖哩角

飲完湯食到呢道已經飽飽地

主菜嚟啦, 我們選了蒜蓉炒青豆 HK$48, 咖哩魚 HK$52

主食配薄餅及香飯.  通常的白飯都唔會食, 因為實在太飽

的餸碗薄餅已經好夠啦.

呢道的奶茶我覺得好好飲, 的茶葉好香, 唔需要落糖都好好飲

呢道晚上八點後有Live Indian Music, 我相信好多印度人會嚟囉.

埋單連加一HK$110, 每人都只係HK$55.  

不過印度餐都只係久唔久先食吓, 唔可以入我地主流十大飯堂.

意外驚喜

April 3, 2014, Thursday night

今晚一個小時內煮埋兼食埋晚餐已經覺得非常輕鬆愉快,  跟著在書檯上發現了一個小包裹, 令我開心到不得了.

呢, 就係呢個小包裹, 係大公子由加拿大寄出嚟架.   郵費C$20.  外面declare 係Necklace.

拆開嚟睇, 好靚呀!  見到中間玫瑰金有個MOM字, 我真係開心到眼淚差不多掉出來.

原來大公子在加國都好記掛著我.  見到呢個吊咀有個MOM字就買比我.

以前大公子每年暑假都會返香港, 但現在畢業在那裡工作, 暫時沒有那麼多假期, 應該有一段時間都不會返香港.

兒女長大了在外發展, 做父母的只可心中記掛.   收到這小小禮物, 知道兒子心中記掛著我, 真的十分開心.

馬上whatsapp大公子多謝他!