香葉泰國餐廳

Dec 10, 2015, Thursday

呢排真攪笑, 去泰國就唔食泰國菜, 返到香港就不停食泰菜.

 
香葉泰國菜館最近响漆咸道開咗分店(即係以前龍門舊址).

新店開業之後, 每日門口都排哂長龍, 我地經過幾次, 見到條人龍都唔想等啦. 


哈, 今日經過竟然無人龍(都無諗著食嘅), 咁就即時改變主意入去食啦.


新裝修, 的座位都好舒適.

要了午餐, 飲品先到, 一放到嚟, 覺得好靚喎.


麻煩鬼要了紫花茶 (即刻令我聯想到紫花油), 麻煩鬼叫我取一小匙試吓, 有香味, 但飲落就無咩味.


我同慢摩摩要了香茅茶, 我覺得好香呀!


例湯到啦, 哈哈, 做咩湯渣咁多, 但的湯得咁少嘅.


我要了海南雞飯

慢摩摩同麻煩鬼都要了豬手飯.  的豬手去了骨, 雖有皮, 但覺得一的都唔膩, 又幾好喎.

我呢份午餐, 都滿意架!

每位都係hk$58.  唔貴喎, 呢道坐得舒服的, 食物企理的, OK呀!

我地諗著下次嚟叫兩份餐三個人食.   哈哈, 做咩咁慳?   其實係見到佢地的炒粉麵飯頗大碟, 一個人食會好飽...在加上又想食甜品.

呢客芒果糯米飯好吸引呀! 不過要hk$65一客, 仲貴過份午餐呀!

咁下次叫一份炒麵, 一份炒飯, 再加芒果糯米飯, 三個人就應該夠食啦.