素鵝

January 28, 2017, Saturday

年初一的早上都真係幾忙, 要焗椰汁年糕, 跟著就包素鵝.

平時素鵝年三十晚做, 但又忙著整蘿蔔糕芋頭糕, 咁今日焗緊椰汁年糕時, 就包素鵝啦.

腐皮在大埔樹記買的.  一次過買埋枝竹碎腐皮, 用嚟炆羊腩及煲腐竹糖水

樹記的腐皮真係靚好多, 切哂邊, 厚薄適中, 塊塊都咁靚.  一開四用嚟包就啱啱好.

配料都已經刨好.  通常我都會用五款,五隻顏色,但唔記得買蓮藕,咁就用咗白藺蔔代替.有黑木耳,白蘿蔔,紅蘿蔔,翠肉瓜,沙葛.

 
炒好哂(當然要試味啦),哈哈,我好認真架,又稱吓的配料有幾重,睇吓每年要落幾多料,咁包起嚟件件都咁上下大哂啦.

調好甜豉油, 先將腐皮上色

然後再包

包包包包包,

包好再用保鮮紙每兩件再包.   食時可蒸可炸, 送禮都得.   我成日都係咁送去比媽媽食架.

年糕焗好, 素鵝包好都已經中午十二點, 真係要出門口去奶奶屋企拜年啦.

哈哈哈哈. 記得攞禮物, 記得拎焗好的年糕, 但就唔記得拎素鵝..

今年去奶奶家拜年, 少咗大伯一家十口(年前嬸母的媽媽過了身, 有白事, 他們不能回來).  我就百無禁忌, 但奶奶年紀大呢排身體差咗, 我地唔敢出聲亂嚟呀.

都要多謝二嬸母, 呢個新年靠哂佢....昨晚團年全都由佢同工人姐姐攪掂.

返到去, 的素菜剛剛煮好....數吓數吓, 咦, 七碟唔係咁好意頭喎....二嬸母話唔怕, 即刻焯多碟生菜.   都係我啦, 唔記得拎素鵝, 如果唔係就口啱啱好啦.

碟生菜上檯...哈哈哈哈, 嬸母加咗的素鮑魚上去. 我話唔係呢的唔係素係仿鮑魚嚟架...  kakakaka, 大家話無所謂, 二公子最鍾意食, 大家一二三夾哂的仿鮑魚嚟食...

 

晚餐又係二嬸母的功勞, 全部都係佢同工人姐姐攪掂.   唔係我唔去幫手, 只係個廚房太細, 兩個人已經係極, 容納唔到第三個人呀!