Oyster Express

2011年8月20日下午2:52公開累積瀏覽 83 0

August 11, 2011, Thursday Night

 

星期四放工後去上瑜珈堂.  上完堂唔使趕返屋企, 因為型爸同兩個仔响Oyster Express等我食飯.  佢地之前去咗飲野, 都等咗我個幾兩個鐘.
呢間Oyster Express响山林道, 我去到都差唔多九點.  咦! 仲係好多人喎.  唔係好多張檯, 都差唔多坐滿.

我未到前佢地叫咗兩碟串燒等我....我一到的串燒就到啦...嘻嘻..

鹽燒大蝦, 黑椒牛脷(嚟到123已經食咗, 邊記得影相)
呢道叫Oyster Express, 都以生蠔為主打.  我地打咗電話嚟問, 今日可以有十幾款蠔可以叫...

第一round叫咗澳洲嘅Smoky Bay, 法國嘅Fine De Claire, 仲有愛爾蘭嘅Irish Premium.   每款四隻, 但呢一round我地覺得麻麻, 的蠔唔夠濃味.

第二round叫咗英國嘅Bretonne, 麥西哥嘅Mexican Rock, 同法國嘅Navie Pearl (黑珍珠), 每款四隻.  呢一round嘅蠔味道濃的, 我地比較喜歡.
相比起Island Seafood, 呢道的蠔平的, 但我地覺得Island Seafood的蠔好似比較靚的.
食完生蠔我地就叫野食啦.

香煎鵝干

煎紐西蘭羊扒

白松露白汁大蝦意粉

蠔汁蘑菇意粉
佢地之前食咗少少野, 所以唔係太餓, 我地今次都無叫牛扒...

食完叫埋單, 佢地又送咗一碟小食過嚟....請我地食嘅喎...

蒜汁墨魚鬚, 不過的汁超鹹

食完我地諗著埋單然後去黃埔食芝麻蛋白燉鮮奶, 但係佢地極力介紹個甜品, 牛奶布丁... 見佢地咁落力, 都好啦, 叫兩個, 食落都唔錯, 但顧著同個小姐傾謁(的甜品話係佢做嘅喎), 唔記得影相啦.  

型爸話我整個的意大利奶凍好味的喎... 攪到大公子哦我仲未整比佢食... 唉吔, 仲有兩三個星期佢又要走啦.

埋單hk$2,072...

呢道的食物水準只係普通.  嗰位小姐問我, 我都好老實同佢講.   我地幾個講起, Island Seafood 的野係貴的, 但食物水準可以保持, 每次去我地都係記著要食嗰個黑松露長通粉....大公子又問幾時同佢去食....

食咗牛奶布丁就唔去黃埔食芝麻蛋白燉鮮奶啦....乖乖返屋企啦.