2011年12月15日 星期四

南丫島舢舨海鮮酒家


2011年12月15日下午10:07公開累積瀏覽 190 1


新中環碼頭, 我都係第一次嚟咋


要去四號碼頭搭船去榕樹灣


睇吓船期表, 要五點二十分先有船呀!


上船啦.. 大約25分鐘就到啦

十幾年未去過南丫島, 天寒地凍, 去嗰道做咩?
 

呢, 就係為咗佢嘞. 我地想收養佢呀! 佢而家住喺寄養家庭, 我地應承咗今日去探佢, 睇吓大家啱唔啱key.  帶著佢行咗成個鍾, 覺得佢好乖喎, 我地都好鍾意, 真係要認真考慮. 呢個係對佢一生嘅承諾, 唔可以輕率.   同負責人傾吓講吓, 都成七點幾, 都係响南丫島 食埋飯先返出去


去咗碼頭附近呢間餐廳


舢舨海鮮酒家....哈哈, 即刻諗起周潤發嗰套秋天的童話....記得套戲臨散埸, 佢開咗間餐廳响碼頭附近, 就係叫Sampan.

坐低就送嚟一碟菜甫, 應該係當茶芥收錢..... 今日係星期六晚, 只得幾檯客人, 唔知係咪凍得制無人入嚟呢?  當其時好多間食肆都派人企喺門口拉客.

我地想坐八點船走, 求其叫的野...不過上菜都好快.


豉椒炒大蜆, 味道唔錯, 不過得十幾隻

清炒芥蘭, 都好靚喎

炸豬大腸, 呢碟就麻麻

椒鹽豆腐, 呢碟豆腐整得好好呀!

椒鹽鮮魷, 呢碟都好好味喎.
 

我地每人叫一兩樣, 嚟到先知大部份都咁香口.  唉吔, 仲好高膽固醇添
 

最後加多碟蝦醬炒飯, 要快的食, 趕船呀!

埋單hk$510

時間啱啱好, 七點五十分, 行去碼頭都只不過係五分鍾, 趕得切八點鐘船...perfect...

沒有留言:

張貼留言