Pad Thai

2011年9月30日下午2:26公開累積瀏覽 1354 0

September 25, 2011, Sunday Night

 

按摩按咗幾個鐘, 不過今日唔知點解按完都唔覺得relax, 平時按開嗰位技師唔得閒, 再加上隻腳仲有的痛, 成日要就著就著.... 當然按吓都好過無按嘅.
晚上, 林老闆又帶我地去粉嶺搵食

就係呢間Pad Thai啦, 去到時, 好多人响門口等位.  不過唔使等好耐就有位, 地方細,  但流轉都算快.

再睇吓, 原來呢條街叫聯昌街, 有間爵士拉麵喺對面.

鋪仔好細, 數過得七張檯

再睇吓的餐牌, 的價錢都算抵食喎

粉麵都唔貴. 的飲品仲抵飲,  十幾蚊一杯.
嚟到又等林老闆發辦, 點知佢叫餸的口味同我地好相似喎, 我諗如果我地發辨, 都係叫咁上下野.

無骨海南雞, 隻雞好滑.  的醬汁都唔錯

咖哩炒蟹, 好味, 的蟹好多羔喎.

叫咗呢客蒜蓉包醮的咖哩汁...好味

肉鬆生菜包, 的肉嚡咗的, 但係都ok喎

大辣冬陰公湯, 但係一的都唔辣嘅

豬肉牛肉串燒, 每樣半打

蝦醬炒飯, 都幾好味喎.  一見到呢碟, 就覺得好似嗰日响新曼谷餐廳食嗰碟, 都係有的泰國臘腸放喺飯面.

炒椰菜苗

炸蝦餅, 哈哈! 初時仲以為係蔥油餅添

型爸唔夠喉, 仲要多一客蒜蓉包醮的咖哩汁. 不過呢一客就燶咗的
我地叫咗好多杯飲品呀!  六個大人一個細(林小b), 叫咗九杯飲品, 因為的男士都encore叫多一杯

珍多冰三杯

龍眼冰一杯

青檸梳打四杯, 型爸同林老闆每人飲兩杯

二公子飲完杯珍多冰就叫咗杯凍檸賓.  比咗一支小餅裝, 再比一個杯裝著冰同檸檬等佢自己加落去.

呢餐叫咗好多野好夠呀!

埋單唔使一千蚊, 我地六個大人, 人均hk$160, 叫咗咁多野, 都算抵食.  上次去新漢記, 人均都要hk$280...

真係久唔久要周圍食吓, 唔使成日都去同一間.

呢間好味抵食, 遲的再嚟幫襯

Glenmorangie

2011年9月29日下午2:11公開累積瀏覽 148 0

Sep 24, 2011, Saturday Night

 

最近訂咗隻GLENMORANGE嘅whisky, 今日就介紹一吓.

訂咗三支, 三支唔同口味, 不過一晚就飲咗兩支.

就係呢兩支啦.  不過今日好忙, 佢地飲完, 我都唔記得留起個樽影張相

呢支係12年, 叫Nectar D'OR.

個樽掉咗, 我就利用酒行比我嘅brochure呢張相, 個樽係咁樣架.  不過我覺得佢地飲嘅次序有問題, 我同型爸講佢又唔聽, 飲完支18年先飲呢支12年, 就覺得呢支有的失色啦.  我試咗兩啖, 味道好特別, 但唔識講係咩野味.  要加少許蒸餾水或加冰飲就覺得好飲的.

呢支係18年, 價錢貴一倍, 包裝當然都靚的

又利用吓酒行比嘅brochure, 個樽係咁架.  酒味唔錯, 哈哈, 都只係飲咗兩啖.

呢個係tasking note.

包裝入面仲有呢個envelop, 叫我地上網去佢地website比的評價.....  哈哈, 應該都唔會咁做啦

佢呢張相就影到樽酒好靚啦.

佢地飲完, 對呢支酒嘅評價都幾好, 應該會再訂.

味椒鹽香茅雞翼

2011年9月28日下午2:21公開累積瀏覽 431 0

Sep 24, 2011, Saturday

 

今晚BBQ, 諗著用新醃料醃雞翼, 希望早上醃, 今晚燒都應該夠味啦.

呢隻味椒鹽係三家姊介紹我用, 佢話用嚟醃豬扒雞翼都會好好味.  今次買咗幾十隻雞翼, 份量多, 都唔知要落幾多, 都係隨意....斷估

再加埋呢隻香茅粉, 都係隨意落.  的香茅粉好香. 如果有新鮮香茅, 可以用新觧香茅切碎嚟醃.  不過屋企無新鮮香茅, 等一陣先去買嚟整烏頭, 都係要用著的香茅粉醃雞翼先.

的雞翼解凍後, 先用鹽略醃, 再用水沖去一去的雪味. 瀝乾水份, 再用味椒鹽, 香茅粉, 老抽, 油, 少許糖撈勻.  無落生抽, 因為味椒鹽, 鹽都鹹, 落得太多驚鹹.  不過我驚唔夠味, 都落重手咗, 呢大盒係晚上BBQ嘅.  跟著就可以放入雪櫃.

另外分咗一個細盒, 有十幾隻留返嚟做餸(如果燒野食唔夠又可以拎出嚟),  煎或焗都可以.

睇吓! 星期一用嚟做餸架, 焗起都唔錯架.  焗完出嚟, 加的蜜糖再焗5分鍾就得啦.

可能隔咗一日, 我又落重咗的手, 我覺得有的鹹, 但型爸同二公子就話都ok 喎.

教咗Ruby呢個醃法, 等佢又多一個方法整雞翼, 教多幾款, 多的選擇啦.

山林道太湖酒家

2011年9月27日下午2:18公開累積瀏覽 110 0

Sep 23, 2011, Friday night

 

今日二公子生日, 約咗的朋友返屋企玩, 咁我同型爸就識做"閃"啦. 唔通仲返屋企食飯吖..

型爸約咗的舊同學飲野, 喝著一齊食晚飯.   本來預備去山林道加流灣食火鍋, 點知去到無位, 再

去另一間火鍋店, 又係無位....香港人真係鍾意食火鍋....
星期五晚, 無訂位就係咁架啦.

結果去咗太湖, 大把位....

一坐落人未齊, 先叫碟燒鵝食著先, 仲要等多兩位同學嘅太太.  不過呢碟燒鵝就麻麻啦, 其中有兩位話個鵝頭位置有陣味, 但我地食鴨身又無事喎, 仲覺得淡味添.  最後經理攞入廚房比廚師, 廚師話可能八角落得太多喎.  

呢個係砂鍋鮑魚雞煲, 入面的蔥頭幾好味喏

椒鹽蝦一般啦

涼瓜田雞煲, 涼瓜ok, 但係的田雞就一的味都無

蝦子柚皮, 呢味又唔錯喎

椒鹽九肚魚就唔得啦, 炸起出嚟, 的粉漿都唔脆嘅

黃油蟹粥, 麻麻喎, 睇落有色, 但係唔覺好有蟹鮮味喎

呢碟送粥油炸鬼就真係超差, 硬到死, 仲好似話係風乾... 都唔知攪咩....

叫咗唔係好多野, 埋單都要千幾蚊...

野就唔係好好食, 但係大家都好開心, 仲要嚟個即興, 話明天去我屋BBQ, 型爸問唔好, 我話唔係阿麻, 無準備喎, 但型爸實在太好興緻, 咁老闆出到聲, 無準備都要攪架....

 

坐的士返屋企途中, 個腦都未停過....咩都未買又未醃...點攪呀!  型爸話買醃咗嗰的用咪得囉...吓! 點得呀...唔好食嘅喎...唔緊要啦, 食咩都唔緊要啦, 大家聚一聚啫...點得呀....有壓力添....

返到屋企, 二公子佢地切緊蛋糕喎, 今年講咗唔整蛋糕比佢啦, 個蛋糕係佢的朋友送比佢架. 咁梗係請我地食啦...

 

食完蛋糕, 腦中又盤旋著明天嘅BBQ....還好, 屋企有羊架, 又有靚牛扒.....

Regal 925 Party 2011

2011年9月26日下午2:20公開累積瀏覽 65 1

September 22, 2011, Thursday Night

 

今天晚上應酒店嘅邀請, 參加佢地925 Club annual Party

睇吓張invitation card....今晚主題係 Back to the 60's

 

响Regal Riverside Hotel 嘅ballroom 舉行

今晚嘅function唔適合影相, 所以無影, 但現場氣氛相當唔錯, 好多參加呢個party嘅出席者, 都有配合主題, 穿帶著60's 嘅衣物.  酒店安排了幾隊參加比賽, 都是酒店識員+酒店客戶, 似乎個個都有練習, 有備而戰.

之後, 就由舞蹈教師黎國強, 婷婷表演拉丁舞.  又係無影相呀! 不過party後佢地派咗個folder, 入面有張leaflet, 咁又可以影出嚟啦.

呢個頭飾同手鐲係入場時比我自己揀, 我著咗深色衣物, 嗰位小姐話白色趁的喎.

今晚大會提供嘅食物都唔錯, 竟然有懐舊嘅麥牙糖夾餅干, 哈哈, 我鍾意, 食咗兩塊.

Party 晚上八點幾就完, 走時每人派咗個膠袋, 入面都係酒店嘅簡介, 仲有舞蹈學校嗰張leaflet

呢張旅遊發展局嘅leaflet

 

環保袋一倨.

返到屋企都係唔使十點.....