好耐都無整過焗燒腩啦, 成日都覺得焗义燒或者焗豬肩胛比較快, 大家都係肉, 無燒肉咁"肉"同"肥膩".
今晚咁多人一齊食, 焗起都係每人食一兩嚿, 一於焗燒腩嚟慶中秋
呢次係跟T&P嘅方法去焗
叫肉檔切咗嚿四平八穩嘅五花腩, 大約兩斤
調味: 鹽1茶匙, 五香粉1茶匙, 花椒粉半茶匙, 紹酒2-3茶匙
我無花椒粉, 即刻用搥盅
將的花椒粒搥成粉
除咗豬皮以外, 將的調味搽勻豬肉,
為咗方便焗好之後切, 叫肉檔將腩骨略切, 等焗好時比較容易斬
我嘗試用呢個肉針刺落的豬皮, 但無咩用, 生肉嘅皮係好難剌
將粗鹽排滿豬皮面. 醃好放入雪櫃... 到晚上焗時才拿出來
焗前將的鹽掃走
預熱焗爐230c
將燒腩放入一個有隔嘅焗盤. 放上層, 下面焗盤放少許水
入焗爐前我無用油搽豬皮面, 豬皮面並沒有爆開. 焗咗10分鍾之後, 取出, 用針插插勻豬皮, 的豬皮因為已半熟, 好易插, 仲標咗好多油出嚟.
再入焗爐焗, 豬皮開始爆. 焗咗15分鐘後, 由上格放至中格
再焗45分鐘, 睇落焗起都唔錯喎.
但係用刀切嘅時候, 就知的燒肉皮唔夠脆
側面有的還可以, 中間部位嗰的皮都無爆好, 得個硬字, 唉! 今次又要比自己唔合格, 脆皮燒腩, 的皮唔脆, 就梗係唔合格啦.
斬起分兩碟, 的鄰居真係好比面, 雖然有的皮唔脆, 但係佢地話的燒肉幾好味喎. 其中一個話佢都唔食燒肉皮, 無問題.
究竟有的咩野問題呢? 我呢個焗爐係咪唔夠大火呢? 咁係咪要焗耐的等的皮爆好哂先攞出嚟呢?
的燒肉都差唔多食哂, 剩番幾嚿. 不過激發起我下次又要再整過, 下次一家要的皮爆到脆.
沒有留言:
張貼留言