昨天忙咗一日, 今日諗著輕輕鬆鬆, 明天家人嚟, 今日有好多時間預備明天的晚飯.
但有的事係人算不如天算, 點知會發生的咁嘅事.
早上帶Loki去狗公園, 今日無咩人, 只有一隻咖啡色Poodle, 佢狗仔嚟架, 一開始就吠Loki, Loki就梗吠佢啦. Loki一吠佢, 佢就即刻走. 咁我坐低, 型爸就帶Loki去行一圈, 隻Poodle好可愛, 行埋嚟嗲我, 叫我摸佢. 我一摸佢個頭, 佢就成隻挨落我道, 佢真係好乖呀!
呢個時候型爸帶Loki返嚟, Loki見我摸著Poodle, 兩隻狗都無吠喎, 咁型爸咪放Loki行埋的囉. 點知Loki突然衝埋嚟想咬Poodle, 我即時用手一擋, Poodle走開, 但我隻手就即時流血, 仲好痛添.
嘩! 真係痛到入心入肺, Loki比型爸用狗帶打咗兩吓, Loki見到我流血, 嚇到坐咗响道. 我即時用蒸餾水洗手, 開車返屋企. 返到去, 再清洗傷口, 血唔係流好多, 不過真係好痛. 過咗一兩個鐘, 覺得都仲係好痛, 出去食晏, 順便睇醫生. 出到去, 兩三間24小時診所都無開門, 咁求其搵間店食碗麵先啦. 周圍的診所都無開, 無辦法一陣間要去急症窒, 唔知要等幾耐呀, 食少少野先啦.
好多鋪頭都無開, 只有呢間串串貢開
咁串, 就呢間啦.
自家製真味肉燥麵....點知好難食架.
型爸叫咗碟雞扒炒公仔麵, 一睇就知唔係炒啦, 的野真係唔得喎.
仲貼著張紙, 新春每碗麵加HK$5
型爸食唔飽都唔再叫啦.
轉去橫街, 見到有間餃子大王, 之前嚟呢道食試過的汁有小強, 唔敢入去食.
外賣鍋貼啦...
但要鍋貼, 唔係鍋貼, 只係煎餃. 新正頭個個都放假, 但佢地無我放, 見佢地的面口都唔係好好睇, 算啦.
隻手越嚟越痛, 仲腫起上嚟, 要快的去睇醫生啦.
沒有留言:
張貼留言