醉雞 (去骨)

Jun 18, 2016, Saturday

星期五晚打麻雀都有個好處, 打得夜咗, 第二朝唔使返工可以瞓晏的, 跟著星期六日就可以做要做嘅事, 唔使浪費一日假期.

整完醉豬手, 反應咁好, 我今日又嚟醉過... 不過唔係豬手而係雞

浸完豬手, 仲有少少汁剩, 唔好嘥, 可以用, 不過要過濾哂的雜質

跟著人從新再調味. 

都係用呢的材料, 但整醉雞唔可以咁鹹, 所以今次用咗10湯匙香糟露, 4湯匙花雕, 1 湯匙魚露, 再試吓啱口味就得.

隻雞唔係太大, 蒸20分鐘, 倒起的雞汁, 用凍水解溫, 再加冰.  咁樣的雞皮會好爽.

降溫之後就可以切及去骨, 先切翼同髀出嚟

將雞殼打橫切, 分開胸及背, 然後起的肉出嚟.

跟著就起埋的髀同翼

攪掂啦....全隻雞, 只係雞翼尖有骨咋....呀, 仲有雞頸.

跟著倒的花醉雞汁落去, 加蓋放入雪櫃

的雞骨同雞汁都唔好嘥呀! 可以用嚟煲湯.   的雞汁撇咗的油, 真係原汁原味呀!

第二天....

浸醉雞千祈唔好浸咁耐, 當晚唔食, 浸最多四小時就要倒起的汁, 如果浸得太耐, 的雞肉會苦架.

今次浸嘅效果非常好... 型爸係咁比likes....