2016年7月27日 星期三

Canada Trip - Day 1

June 29, 30, 2016, Thursday

今年本來都無諗著去加拿大,  唔想坐咁長程機, 結果就要轉機, 再長程的....哈哈, 人都真係唔好亂講野,  哼哼...唔想唔想結果都係去.

事沿五哥五嫂安排了兩個月的悠長歐洲假期兼跑兩個馬拉松, 七月初至七月尾有兩個星期空檔, 月底要去英國參加兒子的大學畢業典禮,  希望趁呢兩個星期空檔去一次加拿大.   佢地一家未去過加拿大, 想我們一起去.... 咁我同型爸又好遷就得人,  加上好開心可以一齊去加國旅行探親, 又可以見見大公子.   咁結果應承去啦.     去年話去兩次日本都唔想飛一次加拿大 (結果去咗三次日本), 哈哈, 今年唔想咪, 結果又要去.

以前每次都坐國泰直航多倫多, 停多倫多之後再飛溫哥華, 跟著直航返香港.   但今次好慳家,  為咗每人慳幾千文, 兩個人加埋七八千文, 結果坐大韓航空, 要飛首爾, 再轉機去多倫多.

七八千文, 轉咗做加幣都好好使, 咁轉機就轉機啦.  況且坐長程機有幾個鐘落落地都係好.   最好就係零晨機, 一上機就盡量瞓瞓瞓, 轉機之後又係瞓瞓瞓, 瞓到去早上十點到多倫多, 時差關係, 同一日早上, 好似慳咗一日呢!

轉機時响首爾機場五點幾, 太早的商店都未開....哈哈, 個人都仲係蒙吓蒙吓唔夠瞓, 點會仲去shopping 吖.


大韓航空的空中服務員幾好架.  按時都招呼飲品


的飛機餐都ok架.

但如果要我介紹, 坐大韓韓空, 最好就係食佢地嘅韓國餐, 呢款係拌麵, 拌飯都好好食架.

連轉機時間成二十二個鐘, 都真係幾攞命....卒之到啦.  出到多倫多機場, 哈哈, 有進步, 的行理車唔需要比錢啦.

我太好心及太熱心, 出咗immigration 在洗手間執到個相機, 要交去Lost & Found, 結果攪到我用多半小時....咁人地漏低個相機好慘加麻, 如果第二的人貪心攞咗, 咁連攞返嘅機會都無.   我只係花多少少時間啫.   不過拎到去Lost & found, 我見佢地都無落record....總之我盡咗自己能力啦.

好掛著大公子, 卒之見到佢啦....無肥到但大隻咗, 成熟咗的啦.

拎咗的行理返佢屋企, 第一時間去食的野....想食熱熱地嘅湯麵呀....

型爸話不如去food court, 咁味多樣選擇.   大公子話Teriyaki有soup noodle, 咁就試吓啦...

吓, 做咩soup noodle 都要炒架???

 
 結果我同大公子都要咗soup noodles....睇落個樣唔差, 但我真係未食過咁難食嘅湯麵.   佢地炒好的都, 然後加的湯落去, 的都係硬硬地架...之先叫炒麵好過啦.

我問型爸要唔要試吓我地碗湯麵, 佢陰陰笑咗話唔使啦, 佢佢碟飯安全的.

食完型爸話要去超市買酒, 佢話買的啤酒, 晚上返去同大公子飲番杯喎...呢道買酒, 要去賣酒嘅專賣店.  跟著又去超市買薯片, 結果又買一大堆零食.

跟著就返大公子屋企休息一下, 晚上約咗老友一家食晚飯呀!

返到大公子屋企, 就要介紹吓佢兩隻猫猫, 幾可愛架, 又識睇電視, 有一隻仲識開露檯隻門


睇吓, 兩隻好鍾意玩電視遊戲

老友每年都返香港, 我就幾年先嚟一次加拿大.  今次嚟行程緊密, 第一天就約佢食飯, 唔係跟著都唔知安排邊一日.

呢道的中式酒家, 水水準都ok架.   今日除咗個牛腩怪怪地, 中唔中西唔西咁, 其他餸菜都ok啦.

費事爭埋單, 一早叫大公子出去先比錢.  C$149.16, 加15%小費, 即係要C$172.   今餐係專誠多謝老友鬼鬼, 佢個仔幫大公子搵樓, 佢老闆間律師樓幫手做契, 佢地幫大公子好多忙呀!

食完晚飯, 返到大公子屋企, 沖完涼睇電視再嚟夜宵.   原來佢地嗰邊, 可以追貼香港的電視劇架.

大家傾吓講吓, 型爸飲啤酒, 我同大公子飲voka tonic, 都真係好開心呀!

最可惜二公子呢幾日請唔到假, 如果佢都一齊嚟就好啦.

沒有留言:

張貼留言