醉雞汁

September 28, 2016, Wednesday

呢排成日整醉咩醉物, 屋企枝香糟露用哂.   買咗隻雞蒸好, 調汁時先發覺, 咁就叫型爸幫忙去買啦.   型爸去到超市, 詰無香糟露, 但有醉雞汁, 問我買唔買... 咁梗係買啦.    佢話有兩隻牌子, 買邊隻好...是但啦....

咁佢買咗返嚟, 哈哈, 仲好醒話呢隻係香港製造, 安全的.

我倒咗少少出嚟試味....嘩, 好味得咁緊要嘅....似雞(精)汁多的, 無咩酒味.

咁我就自己再調啦.  的醉雞汁好淺色.   支汁寫著要用成樽嚟浸, 我梗唔會啦.    我用咗十湯匙醉雞汁, 加咗三湯匙花雕, 一湯匙魚露, 的色靚好多啦.   味道正常的啦...但都係偏"好味"

跟著再加的杞子...

本來諗著整好的醉汁, 明又早上先浸, 但快手倒咗落的雞道.   算啦, 浸過夜就浸過夜

第二朝一早就拎出嚟倒起的醉雞汁...一試, 實在太"好味"啦.

睇嚟如果下次再用呢支雞汁, 要再調過份量, 落少的先得, 唔慣好味得咁緊要.   或者再買枝香糟露中和一下.

咁好味嘅醉雞, 配清炒白菜

蒜椒粉絲蒸黃立鯧

鹹菜胡椒排骨湯

型爸話呢餐好好味呀!

到晚上就知味道啦....做咩咁口渴嘅, 係咁飲水呀!