蒜泥白肉 - 又嚟蟹宴

November 24, 2017,  星期五

今日係組長夫人生日, 本來林老闆預告會有空運大閘蟹到.   點知佢突然有事, 人唔到, 蟹都唔到.

但咁又唔會阻礙今日食蟹的約定, 組長馬上去買蟹, 仲話會買埋蛇羹....哈哈, 正呀, 型爸最鍾意呀!

今晚大約八個人食蟹, 咁我同組長講我整兩個冷盤, 食蟹前可以飲的酒, 頂頂肚.

蒜泥白肉好易整, 我買咗嚿黑毛豬腩, 先汆水, 再入萬能煲加薑蔥炆腍, 跟著用冰塊降溫再入雪櫃, 肉質會腍中有咬口.  嚿肉要凍及有的實先可以切片.   我把玫瑰刀又發揮好大作用, 睇吓切得幾薄.   我;怕淨肉會太膩, 整咗拍黃瓜放中間.  

蒜泥白肉最仲要係個汁, 用咗半碗蒜泥, 三湯匙醬油膏, 一湯匙陳醋, 兩湯匙麻油, 兩湯匙凍滾水, 另外再加咗的辣椒粉......試味, 好正喎!

型爸仲離譜, 不斷話試唔真, 係咁食. 

呢碟蒜泥白肉好受歡迎, 收咗好多個Likes 呀!  佢地話我好貼心, 中間放了拍黃瓜, 配合得好好呀!

除了蒜泥白肉, 我再整多客口水雞

未食蟹, 先食泠盤送酒

跟著就食蛇羹

組長又攞咗壺咸亨出品的花雕酒....好好味呀!

食蟹啦....每人一隻先, 食完跟著蒸第二隻.....組長, 你使唔使預咁多蟹呀!  今日每人最少有四隻呀!  的蟹好多白羔, 食咗三隻已經頂唔著.....

最後蒸埋, 組長叫我地拎兩隻返屋企, 第二食.   咁又係喎, 如果的蟹唔蒸放响雪櫃, 雖然仲係生猛, 但就會瘦, 的羔會減少, 蒸咗第二日翻熱食會好的.

跟著我煮咗薑茶湯丸, 實在太搶手, 好快食哂, 都唔記得影相添.

組長夫人女兒買咗個蛋糕, 我同型爸兩人夾份食一嚿....個胃實在太滿了....真係食唔落!

加上我又飲咗幾杯花雕, 不勝酒力呀!    又醉醉地啦, 要快的返屋企覺覺豬呀!