2011年6月24日下午2:33公開累積瀏覽 326
好耐都無珊瑚草整甜品啦, 橫掂都要浸的珊瑚草做涼拌菜, 今日要再試吓用嚟整甜品!
用咗75g乾嘅珊瑚草(海燕窩), 浸起都有好多. 我用其中小部份嚟涼拌黃瓜, 其他就用嚟整甜品. 用嚟做筵品浸起嘅珊瑚草, 大約都有500g
用咗4公升水(初時用3公升, 後來覺得唔夠, 再加1公升), 我驚唔夠水, 做唔到震吓震吓嘅效果.
今次用咗好多薑, 兩大嚿, 切咗十幾片落去煲, 另外再整咗差唔多一飯碗滿嘅薑汁. 我倒咗一半落去先記起要影相.
最初煲3公斤水時, 的水明顯好大黏性, 我再慢慢先加2杯水, 後再加2杯水, 最後變成4公升. 我加咗大約1斤冰糖, 甜度就差唔多嘞.
當其時好忙, 一路都唔記得影相, 直至全部整好要放落雪櫃先記得.
圓型嘅整咗17杯, 而方型都整咗14杯, 但係今日下午整, 到晚上的海燕窩(珊瑚草)仍未完全凝固. 無法比各部屋試吓, 咁唯有明天先算啦.
第二晚返到屋企, 即刻攞一杯嚟試吓.
嘩! 好啱我口味呀, 夠哂薑味, 真係有震吓震吓嘅效果呀! 都未至於有100分, 但係都應該有95分啦, 好開心呀!
既然自己覺得好味, 梗係要派街坊啦... 圓型嘅全部派哂
剩番的方型小盒我地自己食.
食多個添
好味, 一樣震嘅. 大公子都好捧埸呀!
今次好開心, 希望下次可以做得更加好. 下次可以再試做紅棗桂圓味. 咦! 我買咗黑糖, 加埋黑糖咪仲正. 好一於下次試做.
夏天做呢個甜品都幾好, 夠哂清涼, 好似啫哩咁. 但係啫哩粉都算係化學野, 我呢個薑汁冰糖海燕窩全部天然材料, 無加化學成份(冰糖應該係天然啩!). 嘻嘻, 食落都安心的.
沒有留言:
張貼留言