2011年6月2日下午3:41公開累積瀏覽 47
嗰日睇街坊廚神, 其中一集小儀同金剛去到粉嶺搵食, 我認得其中一間係新漢記. 以前同的鄰居去食過兩次, 但係印象已經好模糊.
嗰日同的鄰居講起, 我地今個星期唔potluck, 大家一齊出去搵食...
就係呢間新漢記. 以前嚟過都知道好多人, 就算訂咗位都要等. 今次為免等位, 我地訂咗6:30pm, 諗著食頭圍唔使等.
我地好準時, 去到已經有預留張檯比我地, 但其他位已經滿哂, 啱啱有人入去話五位, 不過已經開始要等位嘞....吓! 六點半嚟都要等位....
呢道基本上係食客家芋菜
睇落個Menu, 的野一的都唔平
林老闆係呢道熟客, 叫咗幾樣餸, 其他就叫阿漢哥發辦.
前菜有大豆芽菜(坐落已經有)
兩份滷鵝肝
走地雞
呢碟嚟到好醜, 唔知係咩
用隻匙羹撈起先知係肉餅. 問嗰位小姐, 呢的係客家燉肉餅, 加鴨蛋整嘅
客家炆豬肉炒腸
鹹菜豆卜炆門鱔
客家鹹香鴨
豆角炆野生青蟹
豬油鴨掌撈蝦子粗麵
茄子炆魚頭(魚頭得幾嚿, 我都無食過, 都唔知係咪魚頭)
砂鍋大腸
蒜蓉炒蕃薯苗
勝瓜肉碎煮魚鰾, 呢個煮得非常淡味
我地另外再叫了幾個砵仔豬油豉油撈飯. 唔記得影相. 但的豬油唔香, 豉油又唔好味, 有的失望.
的餸上得好快, 我地食咗個幾鐘就食完, 都唔好阻人張檯, 因為有大把人等位.
以十二個大人計算, 每位二佰元.
埋單再响門口影張相, 睇吓仲有好多人等位.
我地意猶未盡....林老闆話去食甜品....一致讚成, 十幾人又浩浩蕩蕩行過兩條街.
沒有留言:
張貼留言