二人火鍋

November 29, 2014, Saturday night

今日同型爸一齊去大埔街市買黑豚豬扒同梅頭粒, 買完去魚檔睇吓....離遠見到的花尾躉賣六元一兩....咁平嘅, 平時去上水街市, 都要八元一兩. 行去睇真的先....嘩! 真係六元一兩呀!   再問吓的頭骨幾錢, 佢話HK$64一斤....即係四兀一兩....咁好抵喎....同型爸商量後, 即刻買的頭骨...

其實佢地有個大花尾躉頭, 大約五斤重, 我好想買咗佢返嚟燉湯....但我無咁大個燉盅, 最後諗諗, 都係放棄.  就算有咁大個燉盅, 都要有咁大個鍋先可以燉得到.

買咗的魚頭骨, 唔使諗, 今晚要打邊爐.

呢一大碟, 斤幾重,  大約一百文.   唔好以為頭骨只得骨無肉, 其實好多肉架. 我喜歡食骨連皮連少許肉, 好好味架.   淨食肉, 我反而無咁有興趣.

咁啱星期四林老闆送咗的潮州手打牛丸, 我再買咗的手打魚蛋

加的腐竹

芫茜, 豆苗, 唐生菜, 仲有牛肉

 
自從買咗大孖勁辣椒油...實在太辣, 已經唔使用生蒜指天椒


懶人湯底....魚湯寶.

我地兩個人, 邊食得咁多. 咁啱見到八號屋女主人, 佢今晚得一個人, 即刻叫埋佢一齊過嚟食.

佢好客氣, 拎咗的黑木耳同竹笙一齊打邊爐...呢的有益健康, 食多的都無問題.

的魚真係好美味, 的皮又厚又爽口, 好味呀!  不過食幾嚿就已經好膩啦.

八號屋帶咗枝白酒過嚟, 飲完我又開一枝白酒, 二人火鍋變三人火鍋, 食得更開心!