五號屋的部落: 大阪隨意行 - Day 3 - 大阪周遊卡

2015年9月26日星期六

大阪隨意行 - Day 3 - 大阪周遊卡 - Part 3

September 17, 2015, Thursday

昨天用周遊卡去咗六個景點, 加埋shopping, 行咗二萬八千幾步, 比起以前, 我一定行唔郁, 但自從行咗山, 有所鍛鍊, 雖然好攰, 都仲頂得著.

今天要早的起身, 八點十五分食早餐. 的早餐又係了無新意. 唔緊要, 係咁意食少少就得啦. 八點四十五分離開酒店, 不過今早唔去周遊著, 先去做的傻事先.

大約九點十分, 我地去到阪急百貨, 已經有人掛隊. 咦, 唔係好多人, 咁好開心啦.

日本真係好興排隊, 我地呢條排BaoBao, 前面百貨公司正入, 的人排隊買和果子. 二月底嗰次我撞啱排隊買卡樂B薯片 (哈哈, 今次唔買啦)

九點半Baobao職員派籌, 我地收到28, 29. 咁好開心啦. 跟著我去咗洗手間.

去完洗手間型爸show咗兩張票比我睇, 佢話頭先只係派抽號碼的籌, 有籌才可以抽真正的輪候號碼. 無籌就連抽號碼的機會都無. 型爸抽到一張29, 一張103. 今日有56個袋, 一個籌限買兩個袋, 如果前面有的號碼無人抽到, 咁我地就有機會買到. 我地發現, 原來有好多排隊黨(中國, 韓國, 日本都有, 但以中國藉居多), 佢地幫手排隊(應該係收人工), 如果抽到早籌, 有個阿頭負責比錢買袋. 咁我都覺得無問題, 人地都係搵食賺辛苦錢啫.

我覺得佢地用呢個抽號碼方法又幾好喎, 杜絕的瞓通宵排隊黨, 純粹靠運氣, 唔係先到先得. 抽到早籌先有得買.

哈哈, 我好彩, 可以買到兩個我喜歡的袋. 不過型爸應承了兩個朋友, 會試吓幫佢地買, 但我地只可以買兩個, 咁明天早上有時間要再試試運氣.

買完再去藥妝店買野, 跟著拎番的野返酒店. 而家的天氣預測真係準, 話落雨就落雨, 希望下午停停雨, 等我去順順利利繼續周遊行.

拎完的野返酒店馬上再出去, 要搵撘機場巴士嘅地方. 明天就要離開, 今日先搵好地方, 唔係明天攞著的行理先搵就麻煩啦.

搵咗一輪, 响內街兜咗一輪, 原來近著阪急酒店嘅機場巴士站, 只要行大街行到H&M, 對著阪急三番街入口, 然後行入去就係. 咁樣快的又唔使咁轉折.

已經十二點幾, 唔急著去周遊行, 先去食午餐

我地今日想食燒肉, HEP Five嗰邊有好多間食肆, 走去睇吓有無啱食. 見到一間叫純, 食燒牛肉, 啱哂, 就呢間啦.

睇咗個午市餐牌, 好快就有決定, 揀咗最靚嗰款和牛, 仲要叫大盛, 梗係, 多一塊肉只係多JPY800, 唔叫就笨呀!

跟著呢兩款要二選一, 型爸話要和牛牛柳粒啦. 咁兩款口味都係, 一樣要大盛JPY2180,因為只相差JPY500. 不過同付應講, 大盛係的肉, 白飯就普通一碗得啦.

我要了Blue berry fruit Jar(入面都有酒精成份, 因為加了果酒), 型爸要了啤酒

飲杯先, 都要碰杯慶祝吓開心假期

等緊野食嘅時候再睇吓餐牌, 午餐真係抵食好多, 我地要嘅牛肉, a la carte 250g, 要JPY1780. 咁晚市一向都會貴的架啦.

送到嚟我影相, 點解得一塊, 原來型爸已經急不及待夾起一塊去燒, 一見我拎相機, 即刻夾番落碟比我影, 真係攪笑.

型爸又真係心急咗的, 要用牛油粒擦吓個鍋, 咁先唔會黐底麻.

呢塊肉燒起真係好正, 一啖咬落去, 入口即溶...好...好...好...好...味呀!

牛柳粒都到啦.

即刻放落去燒

呢款的肉都好腍, 雖然都係靚肉, 但相比起之前嗰塊入口即溶嘅感覺, 呢塊就差咁的啦.

我地另外再叫了一客黑毛和牛生牛肉

一盒入面得好少咋

將的牛肉加落的雞蛋加蔥加芝麻, 拌勻, 食得. 好好味呀! 如果怕食生牛肉或生蛋, 咁就無辦法啦.

埋單JPY7,590, 我地覺得好平呀! 以咁嘅質數嘅牛肉, 仲咁大份, 真係好抵食.... 下次有機會, 一定返嚟幫襯....握介呀!

食到飽飽, 真係要開始我地今日嘅周遊行啦....雖然下午先開始, 但應該都可以去5至6個景點....只要順路唔嘥時間就得.

跟著去嘅景點, 同一個地鐵站, 有三個景點, 要睇吓邊一個景點早關門, 先去嗰個景點.

第一個係坐觀火船, Santa Maria

我地坐四橋線Y11到Y13, 再轉中央線C16到C11大阪港. 都係用手機google map教我地行去目的地.

初時以為要先換船票, 原來唔需要. 每一小時一班, 嚟到仲有5分鐘到三點, 時間啱啱好. 如果唔係用周遊卡, 每位要JPY1,600. 最後一班船係四點(會有更改), 所以我地先玩呢個景點.

只要拎著張周遊卡上船, 比佢地用scanner scan 一吓張咭就可以.

好開心呀! 下午雨已經停了, 天氣非常好 (多謝上天幫幫手, 今日嘅行程, 如果坐船就唔係咁好啦)

隻船都幾大, 應該可以坐幾百人, 但今日係week day, 只有幾十人.

大家都周圍影吓相

呢個天保山摩天輪我地一陣去坐呀!

呢個Santa Maria像, 個個都同佢影張相留念, 到此一遊.

雖然沒有下雨, 但天上盡是烏雲

全程大約30分鐘. 落船時行遠的先影得哂成隻船. 呢個景點我地好鍾意呀!

跟著下一個景點係天保山大摩天輪...哈哈, 好多年無坐過摩天輛, 結果連續兩日都坐. 如果唔係張周遊卡, 可能都未必會嚟啦.

呢道都係唔需要換乘車票, 只需在入口scan張周遊卡.

呢個天保山摩天輪高112.5m, 係世界上最大的摩天輪

如果唔係用同遊卡, 要JPY800一個人

入到車箱覺得有的焗, 因為全部密封

只係腳底下有的疏風位. 不過去到高位, 有生風入就唔焗啦.

頭先由船下面影上來, 現在由摩天輪影下去, 感覺完全唔同呢! 車箱四面玻璃都貼上各方向景點的名稱, 但白色底, 點睇到. 從上面望下去, 見到Santa Maria, 後面仲有一隻船跟著, 我地一陣就去坐, 嗰隻船叫Captain Line. 兩隻船嘅大細相差好遠.

無留意時間, 十幾二十分鐘就坐完, 我地又去下一景點.