2015年9月27日 星期日

大阪隨意行 - Day 3 - 大阪同遊卡 - Part 4

September 17, 2015, Thursday

剛去完三個景點, 跟著又下一站.

大阪府咲洲行政大樓展望台.   開到晚上十點, 可以慢慢去.

 
行返去大阪港車站

哈, 呢個車站有候車室.

我地坐中央線C11到C10宇宙廣場, 再轉車港港城線P09到P10貿易中心前.  好似好轉折, 其實都只係坐兩個站.

2嘅出口, 有哂指示.  leaflet話行3分鐘, 咁又唔得, 5-6分鐘ok嘅.

有指示牌, 跟著紅色線行

出示周遊卡先換票
跟著搭電梯

先坐到52樓, 再坐扶手電梯上去....扶手電梯好長, 好似時光隧道咁.

因為係展望台, 360度, 視野廣闊, 呢道可以望到我地剛去完的三個景點大阪港.

呢道的設計好貼心, 有的坐椅安排, 可以坐低.   前後排都有, 哈哈, 方便的情侶談心.  而上面著燈嘅係展望台餐廳, Planet Cafe


我地今晚會夜食晚飯, 決定在這裡整個甜品下午茶.


窩夫配雪糕+Gingle Ale, 芝士強糕配咖啡


輕鬆優閒咁睇著外面由日景變夜景.   好欣賞呢個展望台嘅設計.  環繞整個展望台都有一塊long bench, 遊人可以俯身望下去影相, 安全視野又廣闊, 同一時間可以容納很多遊人.   相信假日一定好多人嚟.


我地坐在這裡, 望到天保山摩天輪不斷變色, 好像放煙花一樣.

影多幾張夜景相, 我地就離開啦.   仲有景點要去呀!

下一個景點,係我同型爸都好鍾意嘅, 就係去浸溫泉嘞.  天然露天溫泉, SPA住之江.  呢個亦都係我地點解六點鐘都要tea一tea先, 去浸溫泉, 唔可以食飽, 餓著個肚都唔舒服.

坐同一條南港港城線, 由P10貿易中心前到P1住之江公園, 無需要轉車.

二號出口.  leaflet 話行3分鐘係無可能, 我地跟Google map指示, 起碼行咗10分鐘

 呢個住之江溫泉在地下, 唔同昨天嗰個天然溫泉浪速之湯在大型商場八樓.

在櫃台前那幾位韓國人, 我地剛在地鐵站見過, 大家都在搵呢間溫泉, 即係佢地都買咗同遊卡.  如果無同遊卡, 入場要JPY650一位.  但週六週日及國定假期就要JPY750一位.

又係先將鞋鎖入locker, 再去換票.   呢道一樣無提供毛巾, 可以自備.  租就要JPY150一條.   記著留定的100yen要嚟入locker.  鎖鞋要入一個, 入到更衣室又要入一個.   走時會退回100yen.

呢道室內有按摩池, 戶外池又有幾個池, 整日行得咁攰, 嚟呢道真係可以消除疲勞呀!  在這裡逗留了一小時, 晚上八點十五分便離開.

呢道都有餐廳, 但睇落麻麻.  不過我地都無諗著响呢道食.  我地想返梅田先食. 呢個時間, 仲有一個景點可以去.

就係梅田藍天大廈空中庭園展望台.  本來呢個景應該早上第一時間去, 但早上我地好忙要去買Baobao.   我地住梅田, 係咪都要返梅田, 咁安排到最後, 有時間就去, 無時間就唔去.  呢個景點開到晚上22:30, 最後22:00入場.  我地返到梅田都應該大約九點, 仲有足夠時間

今次搭地鐵要行遠小小, 因為要坐四橋線, 改道, 我地都係跟指示行.

今次好抵坐呀, 由住之江總站, 坐到西梅田總站.  全程都只不過大約半小時.

 
嚟呢個空中展望台一的都唔簡單, leaflet 話9分鐘, 唔好信呀.  我地用Google map話步行只需15分鐘, 但我地行吓搵吓, 足足行咗二十幾三十分鐘, 行到腳都軟.  本來浸完溫泉消除疲勞, 現在又行到腳軟.

呢座大廈响Osaka Front對面, 要行一條長隧道....天黑視野無咁清晰好難搵, 不過卒之都搵到啦.

跟著指示牌, 呢的展望台都係要坐長長嘅扶手電梯

去到票務處換票.  無周遊卡, 要JPY800一位呀.  可能呢個景點開得夜又在市區, 呢道好多人.  亦有好多拍拖嚟嘅情侶

嚟呢道就可以睇吓市內嘅夜景.  不過因為係空中庭園, 上面係露天, 所以外圍全部圍著, 影相都有圍欄擋著,  唔似咲州行政大樓展望台貼著玻璃視野咁廣闊.  人又多行唔到出外圍, 只可以離遠望. 有了比較就覺得呢道無咁好, 可能早上或下午嚟, 視野會清晰的, 感覺好的.

呢的市內景點, 通常都好旺埸. 今日只係星期四晚, 近關門時間都咁多人, 如果係假日, 可能要大排長龍.  我地離開時, 遇見兩個外國人拖著行理問我地點去呢個景點, 佢地應該係想趕關門前入場呀!

由梅田行過大阪站再行過嚟要十幾二十分鐘, 行返去都係一樣.  最敝係當我地行返梅田, 好多食肆都已經關門....哈哈, 今勻真係又餓又攰呀!

咁又唔使擔心, 行去阪急三番街嗰邊有好幾間依肆都開到好夜....見到一間有好多人排隊....雖然又攰又餓, 都排.   因為排親隊先係好野, 全部都係日本本地人幫襯.

有的男士真係好似拍戲嗰的咁, 攞著個公事包, 飲到面紅紅, 飲完酒就嚟食碗麵.

呢間叫味拉麵

 
肚餓起上嚟, 見到個廚窗display就更加肚餓, 梗係啦, 十點幾啦.

睇吓入面幾多人, 不過我地都係等咗十幾分鐘啫.  佢地食完麵就走, 流轉都好快.

睇完餐牌, 好快就有所決定, 我同型爸分別要了兩碗辣麵, 一碗明太子飯, 加一客餃子, 兩杯飲品.

呢道可以自助攞前菜, 冬筍及泡菜, 覺得好好味呀! (因為真係好餓)

又餓又渴, 食著前菜飲番杯先.

食完再可以自助添加

明太子飯嚟啦, 仲有半隻溫泉蛋.   細細碗啱啦, 我同型爸每人食少少.  的日本人係咁嘅喎, 又飯又食麵, 我地都要地道一吓.

我要嘅辣濃湯义燒拉麵.  睇落似咖哩湯, 但飲落係麵豉豬骨濃湯

型爸要了担担麵, 味道同我地中式麵一樣, 都幾好味

另外要了一客餃子.

埋單JPY3,350.  食到飽飽啦.

跟著就行返酒店休息啦.  今日又行咗6個景點, 又超額完成.  睇吓型爸隻手錶, 我地今日又行咗二萬六千幾步, 雖然無昨天咁多, 但今日覺得攰過昨天好多.   返到酒店要執好行理, 再安排明天嘅時間, 我地要返香港啦.

呢兩日用周遊卡行咗共12個景點, 做吓總結先.  買卡都只係JPY3,000一張, 但我地嘅景點入場費都唔止呢個數.

1) HEP Five                            JPY500
2) 大阪今昔館                        JPY600
3) 天然溫泉浪速之湯            JPY800
4) 大阪市立科學館                JPY400
5) 上方浮世繪                        JPY500
6) 道頓堀水上觀光船            JPY900
7) 帆船聖瑪麗亞號                JPY1,600
8) 天保山大摩天輪                JPY800
9) 船長線                                JPY1,300
10) 咲洲行政大樓展望台      JPY510
11) 天然露天溫泉住之江      JPY650
12) 梅田藍天大廈空中庭園  JPY800

                               Total :       JPY9360

以上只係入場費, 仲未包乘坐地鐵嘅費用.  如果唔怕行, 唔怕搭地鐵上上落落, 呢張周遊卡真係好抵玩.

呢個trip去咗咁多地方, 都係我地嘅新體驗呀!

沒有留言:

張貼留言