2016年9月16日 星期五

鹿兒島國產西冷牛扒餐

September 3, 2016, Saturday

呢兩個星期Cindy放假, 真係忙到我不得了....咁梗係, 如果唔係點會請工人姐姐幫手.

本來Cindy應該昨天返回來....唉我講應該, 即係佢昨天無返啦.    星期四晚上十點幾, 收到Cindy姊姊Wechat我, 話Cindy做了手術, 不適宜上飛機, 要延遲兩個星期先回來.  跟著Wechat兩張手寫的medical report , 有醫生名, 但無病人名(張紙影得又黑又暗, 真係好難睇).   吓, 咩野咁大件事,  星期五早上要返香港, 星期四晚十點幾十一點先通知我, 仲要唔親自通知我, 搵親人通知....

等我第二天早上, 即刻通知Akiramay睇吓可唔可以re-book張機票, 如果no show, 張回程機票就嘥咗.    點知Akiramay話回程機位, 工人自己已經改咗去9月16日.    跟著我花咗好大精神去研究佢張紙, 先睇到八月二十二日做手術, 二十三日出院.  一天可以出院, 即係小手術啦, 不過已經係十日前嘅事喎.

跟著星期五晚上, 二公子收到一個女士用weChat打來的電話, 用廣東話同二公子講, Cindy割了痔瘡, 手術做得唔係咁好, 仲係痛, 所以要延兩個星期回來.....真係火都嚟埋, 點解打比二公子唔係我, 割痔瘡傷口痛可以理解, 但點解唔打比我,  我真係唔相信傷口痛到連把口講野都講唔到, 連親自同我講都唔敢.....

哼哼, 等我嬲咗一個晚上.....

第二天, 唔嬲啦, 無謂為咗個工人而動氣, 無工人用又唔使死, 自己做多少少啫.   的姐姐返親家鄉都想留耐的, 總要搵個藉口, 佢要遲返我都無辦法, 嬲嚟傷我身.

哈哈, 今晚同型爸撐檯腳, 開開心心食番餐.

兩塊鹿兒島國產牛西冷扒

整多個鮮奶忌廉雞粒蘑菇湯
配個迷你法包.

蔬菜薯餅做配菜

正呀!

我們的美味晚餐

飲品係 Somersby Apple Cider

仲有甜品, 燉椰皇

哈哈, 唔係自己整架, 係响Ocean Three 買的, 只要拆開包裝, 放入蒸爐燉熱就得啦.

 星期六美滿的一餐, 清吓個雪櫃就有咁多野食, nice!

沒有留言:

張貼留言