走牛晚餐

April 26, 2020, Sunday

煲周打蜆湯時真係好忙, 唔得閒影相, 因為好忙整晚餐.

今晚算係食西餐, 點解咁強調走牛晚餐, 因為平時整西式, 主菜都一定係牛(一家都係牛魔王), 咁今餐無牛肉, 咁咪走牛囉.

嘻嘻, 唔係牛就係豬架啦. 其實整吉列豬扒算唔算係西式呢?   記得多年前去American Club 食晚飯(西餐廳), 奶奶唔食牛, 想食豬, 但餐廳係無豬扒供應....要改食燒春雞.

今日整芝心吉列豬扒, 其實都真係好邪惡.

買咗兩件梅頭豬扒, 拍鬆至好薄, , 所以成個托盤咁大.  中間加咗兩塊芝士.  兩邊浸蛋汁, 再加上麵包糠

真係要30cm 煎pan 先夠大, 半煎炸

睇吓, 真係好得呀!   的芝士係咁流出嚟.   一件豬扒可以切成十件, 都真係幾大.

跟著另一邊箱又整個墨魚鬚墨汁意粉

睇落唔靚, 但味道好好的.

炒碟椰菜花

食得啦.   先飲湯..周打蜆湯配 Danish Bread

呢份走牛晚餐都唔錯架.

呢份餐, 足夠我地五個人食.  個個都食到飽飽....咦, 點解無甜品嘅.....二公子買咗雪糕呀!