型爸打電話通知我, 話掛咗紅雨定黑雨, 問我上唔上瑜珈堂, 唔上堂就接我番屋企. 我打電話比Miss問要唔要上堂, 佢話紅雨照上, 黑雨唔使, 不過無得補堂. ok, 自己決定上唔上. 收線之後, 已經掛咗黑雨. 我再打比Miss話比佢聽已經掛咗黑雨唔好出嚟, 佢好似唔信, 佢嗰邊無落大雨. 我問佢响邊, 佢話响東涌. 吓東涌無雨落? 呢度落到個天都黑哂.... 我即刻打電話叫型爸接我.
大約5:50pm 由尖沙咀開車, 沿路非常塞車, 車速很慢, 雨大到開著水潑都睇唔清前路, 某的位置, 的水位浸過車輪. 最為驚心係去到九龍塘向獅子山隧道方向, 窩打老道映月臺, 嗰段上斜位的雨水好似瀑布咁湧落嚟, 一轉彎, 好多黃泥水連雨水好似山坭傾瀉咁一路湧出嚟. 每架車都開得好慢, 打哂死火燈, 一步一驚心. 的雨打落車身"薄洛薄洛"好大聲, 嘈到車內開咗收音機都聽唔清楚. 當其時只想快的去到一個比較安全的位置. 直至入到獅子山隧道, 先至覺得靜的安全的, 鬆一口氣.
出到沙田, 見到有兩三架車撞咗, 唉, 仲有的車開得頗快...
差唔多6:20pm 二公子打電話嚟, 話的水開始湧入屋, 問我地點好, 我地重未試過呢過情況, 只可以叫佢用的毛巾呀, 被呀塞著大門同後門, 等的水唔好入得咁快. 當時車仍在沙田, 真係歸心似箭. 嘗試打比鄰居, 睇吓幫唔幫到手, 點知佢地都出咗嚟, 開車番緊入去, 佢地屋企都開始浸....
呢個時候型爸反而比較冷靜, 同我講浸成咁, 我地應該番唔到屋企, 屋企進出個條路一定已經浸咗. 佢叫我不如出去食飯, 等夜的睇吓情況先再算. 其實我萬千個唔願, 想快的番屋企, 但係都無辦法.
駛咗入大埔墟, 非常塞車, 去到大埔墟街市, 條路已經封咗, 入面應該浸得好犀利. 唯有轉出去再落上水. 呢個時候, 再打比鄰居, 睇吓佢地番咗屋企未... 點知佢地話, 駛咗入條路, 停咗响度未郁過, 另一位鄰居都响後面幾架車塞緊, 叫我地唔好番入去著, 遲的通咗條路再打比我.
咁就真係要聽型爸話, 食餐飯先返去.
差唔多8:00pm打比鄰居, 佢地番到屋企, 條路通番啦.. 我同型爸即刻埋單.番到屋企, 的水已經退哂! 雖然浸到入屋, 但好彩唔算好緊要, Mina開始收拾殘局, 掃乾淨的地方, 我地要開行三部冷氣抽濕一晚. 睇新聞, 好多地方都水浸, 大埔碗窰沙埔仔村有的屋浸到上二樓, 仲有人比洪水沖走. 相比上嚟, 我地算幸運兼小兒科.
今朝早上出門, 已經變得天朗氣清, 沿路聽新聞報導有一個老人家在自己屋內浸死, 真係覺得好難過, 點都無諗過會有呢的事情發生....
短短幾個小時, 好似番天覆地咁, 大自然嘅力量, 真係難以估計.
沒有留言:
張貼留言