呢間御八築地, 開車經過好多次, 但未有機會幫襯...今次响一個大風大雨嘅晚上有緣相聚.
咦! 叫創作料理, 應該同平時嘅日本料理有的分別.
咁大個壽司menu, 唔通專供壽司? 原來唔係, 仲有好多小食同鍋飯, 但係今日無咩心情, 亦唔覺好餓, 所以無諗著叫的飯類嘅野.
叫咗兩碟壽司, 海膽三文魚親子壽司同安康魚肝壽司. 兩款都幾好味. 不過見到其他食客叫三文魚壽司, 一客有五件, 每件壽司除咗件三文魚包著的飯, 仲拖著條長尾, 即係話嗰件三文魚魚生有7"-8"長. 下次有機會再嚟試.
未試過有咁大碗嘅蟹籽沙律. 有幾大, 你見到隔離件壽司, 就知有幾大, 成碗湯麵. 可惜唔係好夠味, 入面又無蟹柳, 沙律醬都唔夠. 不過食呢碗沙律, 好似食咗一大碟油菜嘅份量.
呢碟係地獄炒蜆, 辣辣地. 幾好味.
呢碟係酥炸軟殼蟹, 隻蟹炸得好脆, 但係個汁就好唔好味, 酸得好奇怪. 我地寧願醮的地獄辣汁.
呢碟係串燒牛助骨, 但係無骨架, ok 好味.
本來只係叫咗呢幾樣, 但係仲未收到call, 唔知條路通番未...於是再叫多一樣..
就係呢客炸芝士年糕... 一嚟到, 型爸咬咗一啖再放番落隻碟比我影相... 嘩! 好好味呀, 外脆內軟... 呢個時候電話响, 又停咗. 原來無電. 換電, 打番比鄰居, 條路通番啦....即刻埋單...
好味, 影番張close-up, 可以番屋企心情當堂靚的.
沒有留言:
張貼留言