煎豬腩生菜包

October 4, 2015, Sunday

彩虹襲港, 雖然只係三號風球, 但風勢好大又落雨, 無得行山, 無事都費事出街啦.   咁無咩好做就整吓野食啦.

買咗嚿豬腩, 諗著整韓式燒豬腩...

哈哈, 個腦諗咗好多方法, 用唔用的韓式醬料去醃, 如果醃咗, 咁煎咪好易燶.

停一停諗一諗, 都係叫Cindy幫我切定的蒜片辣椒先.

最後決定, 都係咩醬都唔落, 豬腩切片, 唔落油就咁煎

一煎就迫哂的油出嚟

預備咗兩款醬, 左手邊係日本餐現成嘅醬(八號部屋女主人送嘅), 而右手邊係我自己整嘅, 用韓式辣醬, 麵豉醬加麻油.

豬腩煎好, 的肥油迫咁的出嚟, 咁就無咁肥啦.

所有野齊全...可以食啦

攞塊生菜, 加的薄荷葉, 加塊豬腩, 加醬汁, 蒜片, 青紅辣椒

唔.....又幾好味喎... 好鍾意食包吓包吓嘅野....(例如填鴨, Tortillas....)

豬腩歸豬腩, 始終都係好膩, 食咗三塊已經頂唔著....