川婆婆麻辣粉麵

September 29, 2015, Tuesday


今日同麻煩鬼出去食午飯, 我地兩個都無飯癮, 諗著去新曼谷餐廳食碗泰國湯河.  行到一半, 見到以前Casablanca個鋪位, 改咗做川菜(應該轉咗好幾個用, 只不過我地無留意).  見到有粉麵食, 麻煩鬼話不如入去試吓.

 
 一行上條樓梯, 的地毯做咩咁殘舊....可能係上手留底無換新嘅.   上到去見到的吧檯, 都可能係上手剩响道.

  
 其實我覺得呢個鋪都幾好吖, 有一個小露台位, 有客人想食煙可以坐出面...點解咁多間都做唔著.

我同麻煩鬼都要了四餸粉麵

午市有飯餐, 亦都可以叫小食.

每張檯都有電磁爐, 晚市應該做火鍋生意

我要嘅四餸薯粉到啦, 我要咗少辣, 睇落好似好辣

鐘意食呢的薯粉,依依韌韌, 好味, 四餸: 滑牛片, 魚片頭, 魚皮餃同油麥菜.   食落辣辣地幾好味, 算係幾正宗.

麻煩鬼要了雞肉, 魚皮餃, 水餃, 油麥菜.  佢無要辣, 但唔知點解都係辣辣地.  佢話都幾好味.

 
 我地無要飲品, 只係叫佢比杯水, 每位HK$40

 
 食完行返落地面, 再睇吓佢地的菜牌, 晚市真係火鍋為主....  正宗重慶麻辣九官格火鍋, 咦, 未試過, 下次同型爸嚟試吓先.