辣蟹舫

February 11, 2017, Saturday night

下午食辣蟹舫辣椒油時, 挑起型爸條筋, 佢話晚上就出去辣蟹舫食啦.


呢間辣蟹舫响深水埗, 型爸之前去過, 佢話响咩野停車場側面.

呢道泊車, 架車要入電梯上樓上.   當我地上到一樓, 一出電梯, 見到有張大檯, 真係呆一呆, 以為呢道就係, 原來只係後門.

跟著行入去, 咁就似樣的.   不過後來型爸泊好車, 佢話佢上次真係坐响後面的檯, 因為佢的朋友食煙.

睇落好多款式, 唔知食落點呢

呢排我喉嚨氣管都唔好, 型爸叫咗羅漢果水比我飲,  佢就梗係啤一啤啦.

避風塘炒蟹, HK$488, 一的都唔平呀!  味道又唔係特別好, 隻蟹仲無膏添.

拆用瀨尿蝦HK$128, 原來用的炸粉炸起, 覺得好油膩呀!

黃金豆腐HK$58, 呢碟做得好好, 外脆內軟

水蟹雞粥, 哈, 呢隻蟹反而有膏.

辣酒煮花螺, 呢碟係完全唔得, 的花螺一的味都無, 淨係得的湯汁, 好似將的白烚螺放入的湯汁.   我地要求侍憑試吓, 結果佢話幫我地取消. 

椒鹽無骨魚HK$98, 其實即係九肚魚, 睇落好靚, 但食落覺得好多油

啫啫芥蘭煲, 呢碟好正好味.

我地四個人, 埋單HK$1358, 共中有HK$156係兩樽蟹油辣椒醬....吓, 咪笨咗, 辣椒醬都要加一.

走時見到門口貼咗的明星合照相.

食物都係一般, 唔會話食完好想再嚟囉.

今日叫的野好熱氣, 四個一齊話去食龜苓膏啦.