有時真係唔使約, 擇日不如撞日. 今早同奶奶姑奶二伯佢地飲茶, 講開好耐無食海鮮蒸鍋, 今晚一於同型爸買海鮮食蒸鍋. 點知奶奶姑奶二伯全部都話無試過蒸鍋, 哈哈, 咁一於一陣拜完山, 全部去我屋企食晚飯啦.
今年我地早了三星期, 選星期六, 唔使排蛇餅, 仲可以排隊泊埋架車入去寶福山. 好快手攪掂. 不過今年多咗好多猴子, 等的人一拜完山, 佢地就走落嚟攞的貢品嚟食.
先載奶奶佢地返屋企, 開埋張電動麻雀比佢地玩, 我就同型爸去買海鮮
買咗好多款海鮮....呀, 仲有脆肉鯇唔記影添.
除咗海鮮, 仲有牛肉, 魚蛋罣丸肉丸牛丸, 仲有芝士腸
三款蔬菜加粟米.....齊啦
食物太多唔夠放, 要兩張檯先攪得掂, 一張放食物, 一張就放兩個蒸鍋
咁最好味係咩????
大家都食得好開心, 最開心係見到奶奶胃口大增, 佢今日食咗好多野呀!
雖然做得辛苦, 見佢地開心, 咁我就更加開心啦.
沒有留言:
張貼留言