今日真係忙到八彩呀! 我的家人嚟我屋企團拜, 連大夾細廿幾人, 點坐兩圍檯, 唯有照舊, 又煮餸, 又BBQ, 分開的人流, 等的年青人開心的啦.
早起身炆定的餸, 蒸爐壞咗, 全部都要靠爐頭, 唯有用電磁爐煲湯. 早的煮好的餸, 天氣咁凍, 食前先再翻熱啦.
先炆呢個冬菰海參花膠炆鴨掌
海參只係急凍海參, 花膠係上次買燕窩比媽媽同奶奶時送嘅花膠碎, 係咁意啦. 用薑蔥出水備用
呢的係東方紅嘅冬菰仔, 上次去美亞, 嗰位亞姐話呢隻冬菰好好味, 炆起一啖一個. 我諗吓又係喎, 咁多人, 如果係大冬菰, 可能一人得一隻. 咁就買包嚟試吓. 一次過炆哂一包
鴨掌汆水, 三十幾隻
冬菰先用豉油糖加幾粒八角先炆腍, 再加海參花膠鴨掌再炆30-40分鐘, 直至的海參花膠都腍埋, 最後加蠔油調味
轉落康寧煲, 食前翻熱或再炆都比較容易. 炆起好大煲, 一定唔會食得哂, 我先將部份留起, 下一餐唔使再炆. 一次過炆哂慳火慳力.
都炆得幾好味架. 不過的冬菰仔就麻麻啦, 無咩冬菰味, 下次都係唔好聽佢講.
快快手又要煮第二樣啦.
沒有留言:
張貼留言