陶源酒家 - 美孚店

April 9, 2016

呢排真係好多人病, 的同事病完一個到一個.  今日突然覺得喉嚨唔舒服, 頭痛到爆, 跟著鼻水直流, 唔敢怠慢, 馬上打電話去book睇醫生.   九點幾打去booking, 要下午一點先有得睇, 都無辦法.

型爸咁啱今日要去葵涌, 佢話同我食午飯, 睇完醫生順便送我返屋企休息.

本來快快趣趣食茶餐廳, 但唔係你想食就有位.   結果去陶源, 酒樓反面大把位. 因為呢間相比起另外兩間美孚的酒樓, 呢間價錢貴的. 

咁貴的少的人就坐得舒服的.

 

不過我無咩胃口, 睇見都唔知叫咩...咦, 不過呢樣有興趣喎, 與吃不同脆皮蝦腸, 好, 就叫呢樣.  特點HK$33

跟著要了一個濃雞湯野菌千層腐皮, 呢個係中點 HK$23

我同型爸講唔好叫咁多, 叫多一客炒飯, 如果唔係食唔哂.

突然睇吓又有優惠, 只要開陶源facebook, 只要like及check in, 就有一碗蛋白杏仁荼送.   哈哈, 呢的咁簡單嘅野實做啦.

 

與別不同脆皮腸嚟啦.   咬落去真係脆喎, 即係炸好的蝦春卷, 下面再包腸粉, 好味.  即係以前响富豪軒食的春風得意腸.

千層腐皮...哈哈, 好過食蝦餃燒賣, 因呢兩樣我都唔喜好.

跟著呢碟係廚皇炒飯 HK$98, 入面加咗江瑤柱, 蛋白, 蘭段, 蝦乾, 欖菜.  幾好味.  不過食食吓有的鹹.

好彩叫咗三碟野咋, 真係食唔落, 的飯食咗一碗仔, 全部都要型爸攪掂.

Facebook 讚好, 送蛋白杏仁茶, 我同型爸每部手機都要like, 咁就有兩碗甜品.

雖然只係叫咗三樣野, 但埋單加一茶芥都要HK$191.

加埋甜品, 有五樣野, 合乎去酒樓叫野食2.5的原則.   咁就唔會叫得太多食唔哂啦.