兔年大年初一, 恭喜發財, 身體健康, 日日都要開開心心!

2011年2月5日下午3:56公開累積瀏覽 41 1

February 3, 2011, Thursday, 2011, Thrusday, 大年初一

恭喜發財, 身體健康, 萬事如意, 日日都要開開心心!!!

 

大年初一, 都係一早醒來, 生理時鐘, 七點幾就醒, 不過响張床hea吓, 休息吓都好舒服.

昨天年三十, 整蘿蔔糕, 芋頭糕, 香蕉蛋糕, 真係忙足一日.   昨晚...應該話今早零晨, 瞓落床條腰真係痛得不得了. 休息一晚, 好咗的, 但仲係覺得條腰好.  以前瞓番一晚就攪掂, 而家瞓咗一晚都仲係補唔番.  趁著新年假期, 真的要好好休息一下.

回顧去年, 只可用一個忙字來形容.  事事安排, 事事要做,  雖然開心, 但生活緊張忙碌, 拉得很緊.  每個星期六, 日, 都要忙著做這做那, 時間永遠都不夠用.

 

今年嘅祝願, 梗係要身體健康, 當然要開開心心啦, 但希望生活可以過得得輕鬆寫意, 唔想成日都拉得那麼緊. 

啱啱同哥哥通完電話, 醫院通知媽媽今天可以出院, 大家要安排一下時間, 因為今日中午前要回奶奶家拜年.

返到奶奶屋企, 旱上嗰餐食齋. 今次又係十幾碟. 差唔多食完先記得影.  以前奶奶會整的精緻嘅齋, 或訂的齋返嚟食, 但而家佢年紀大, 咩都唔煮lu, 淨係求其買的返嚟叫工人煮熟就算.

我地有得食就算, 好唔好食, 鐘唔鐘意食都係一餐啫. 順吓老人意思家話好食就算啦.  個工人姐姐做足幾日, 好辛苦. 呢兩日都帶埋Ruby去幫手啦.

的大朋友小朋友一齊玩大富翁, 哈! 佢地玩得好開心.  我地幾個陪奶奶打番幾圈, 但真係悶到頂唔順, 打咗幾鋪就開始瞌眼瞓, 無心機打, 型爸又唔肯打, 唯有搵二公子頂幾鋪.  最終梗係敗北啦.

又係大堆頭, 但又係嗰的餸... 二公子真係唔客氣, 問奶奶點解無哂的鮑魚嘅...

其實我都心不在焉, 食完飯就走, 要去睇媽媽.  佢今日出院, 夜的都要去睇吓佢.  佢返到屋企已經無發脾氣, 但係成日唔肯郁, 話好攰要瞓...  真係辛苦哂家姊, 日夜照顧佢.  我本嚟叫媽媽搬去我到住, 佢又唔肯.  咁唯有密的去睇佢啦.

跟著返屋企lu, 咁就過咗年初一.