星期一, 工作忙得不可開交, 一整個早上都開會, 眨吓眼就半天, 跟著再眨吓眼又到放工時間. 放咗工, 唔係趕著同我舊情人去食蠋火晚餐, 而係去醫院睇媽媽. 媽媽依然一個模樣, 我地同佢講, 趁我地响度, 扶佢落床行吓坐吓, 完全唔肯. 你有你講, 佢繼續唔想聽. 唔願行, 唔願郁. 探病時間到, 八點我地就離開.
離開時就同型爸商量去邊度食飯, 但係都無咩idea, 最後決定去就近沙田上次食過嗰間生昌潮州海鮮酒家食潮州菜.
去到竟然滿座, 要等位, 無論大檯小檯都坐得滿滿的. 不過好彩唔使等好耐. 問嗰位侍應小姐, 星期一晚都咁好生意嘅. 嗰位小姐話今日算人少, 新年嗰十幾日, 日日都爆滿... 真犀利.
今日叫咗砂鍋雞煲翅, 好抵食, 咁大鍋都係hk$288, 面頭嗰的係排翅嚟架. 入面有半隻雞, 仲有十幾嚿豬手. 可惜今日呢個砂煲翅湯好鹹.
凍蟹, 今日竟然無大隻凍蟹. 呢隻已經係最大隻hk$88, 不過兩個人每人食少少都ok, 都幾好味.
煎蠔蛋, 好脆好香口, 但唔知點解無上次食時咁好味.
另外一碟滷水拼盤. 又係覺得好鹹, 唔知係咪用千年滷水汁.
叫咗四樣餸, 除咗隻凍蟹之外, 全部都食唔哂要打包.
唔知係咪心情不佳, 的野好似唔係幾好食, 又無咩心機食. 都係早的返屋企好過.
沒有留言:
張貼留言