2012年10月10日 星期三

香煎醬油素鵝


2012年10月10日下午12:58公開累積瀏覽 641 1


今日首先剪綵嘅係兩塊又大又圓嘅腐皮, 我要包素鵝呀!  兩塊腐皮, 可以包八件


今日用嘅配料係, 冬菰, 雲耳, 甘筍同西芹.  我喜歡落的唔同顏色, 包起嚟靚的, 食落又開心的.  如果有的人唔喜歡西芹嘅味道, 可以用脆肉瓜或白蘿蔔代替
 

西芹先去硬絲, 再刨成絲.  甘筍去皮刨絲

冬菰浸軟切幼

雲耳浸軟切碎


用蒜頭起, 先爆香冬菰及雲耳(冬菰需加糖調味), 再加甘筍西芹絲炒香


落調味(豉油, 糖, 鹽, 麻油, 胡椒炒), 試味.   如覺得的甘筍及雲耳稍硬, 可加水煮幾分鍾.   配料煮好, 盛起待涼.

呢個時候就輪到的腐皮啦.  每塊一開四, 共有八塊
先調個汁, 1湯匙生抽, 半湯匙老抽, 1 茶匙糖, 1湯匙麻油, 1 湯匙水....要試啱自己口味.
 

將的調好味嘅豉油, 逐一掃上腐皮(底面都要), 呢個步驟非常重要

將炒熟嘅配料分成八份...哈哈, 我好認真呀, 用個磅嚟量, 令每份餡料都均勻.

將的配料放在一塊腐皮中間, 由三角位置摺起, 再左右兩邊向內摺, 再摺疊至長方形....八件好快就攪掂.

放入蒸爐蒸8分鐘.

跟著預備送貨...包起兩條比媽媽, 再包兩件比姪女.   

而剩低嗰四條, 我預備用嚟煎.   我出去送貨, 返到嚟Ruby正在煎緊..   唉吔, 要細火的呀, 落咗豉油, 好易燶架.....好彩, 未燶. 

煎好上碟, 再每條剪開四件

睇吓, 皮脆內軟.....好味呀!

將的調味醬汁掃上腐皮上先再包, 呢個步驟, 令到的腐皮更加好味.  外面食嗰的素鵝, 好多時的腐皮都好淡.

呢碟煎醬油素鵝, 正呀!

沒有留言:

張貼留言