June 30, 2011, Thursday Night
好忙呀! 好忙呀! 放工做完瑜珈, 食飯先嚟開工, 真係好攰..... 不過好攰都要做架....
拍黃瓜, 鹽水鴨, 鹽焗烏頭, 全部都要早一日預備, 仲有珊瑚草甜品, 今晚一定要攪掂, 如果唔係又唔夠時間雪實佢....
昨晚已經攞定的乾嘅珊瑚草出嚟浸, 呢道有76g
浸咗一晚, 浸起有590g, 我用500g嚟整甜品
用90g嚟涼拌拍黃瓜
今日預備整黑糖紅棗桂圓海燕窩, 咁當然唔少得用黑糖啦... 台灣出品, 睇咗標籤, 應該無其他添加劑
當然仲有龍眼肉乾及紅棗啦
用咗兩公升水, 煲滾, 落珊瑚草
煲咗大約30-40分鐘, 的珊瑚草明顯變少, 即係煲溶咗的, 的水亦覺得有的黏性
今次要多一重功夫, 要先將的珊瑚草隔篩唔要, 只要清湯
然後先開始加龍眼肉, 煲底嗰幾粒黑色係龍眼肉, 放咗幾粒落去先記起要影相
跟著再加紅棗, 再煲多大約30分鐘
當的紅棗同龍眼肉變腍, 就可以加黑糖...加咗黑糖就變得好深色, 成包加哂之後甜味好似未夠, 我再加少少冰糖
睇落好深色, 但用白色匙羹裝起又唔係深色得咁交關啫
今次有新杯用呀! 陶爸買嚟送比我架, 佢話我成日整比佢地食, 佢要出番的力...哈哈, 真係好鄰居呀! 真係要整多的比佢地食呀!
呢隻杯, 面同底都可以打開, 方便用嚟整布丁, 倒扣亦都方便的
今次一整就28杯
第二日雪好啦
試吓倒扣出嚟.... 衰咗, 唔完整添
比個close up. 都係好深色, 不過都幾晶瑩, 有震吓震吓嘅感覺. 我自己就覺得甜咗的(可能最後加多咗冰糖, 跟著又煲耐咗的水又再少咗)
大家食嘅時候, 都會同啫喱嘅口感比較. 但呢的唔係啫喱嚟加麻, 有的話幾好, 有的又話腍咗的. 不過佢地都話幾好味, 仲健康有益添. 有的仲話要即刻食返兩杯添
最唔捧場嗰個係型爸啦, 佢仲掛著以前現成買番嚟嗰的, 做起似啫哩. 其實我自己今次整都已經幾滿意, 為咗型爸, 再要研究吓點樣調教的份量.
諗吓諗吓, 以前買番嚟即食嗰的究竟有無加添加劑呢? 如果唔係點解咁有彈力嘅.
嘻嘻, 呢個自家製黑糖紅棗桂圓海燕窩, 全部都係用原材料, 無添加其他嘅野, 亦都無諗過加的Gelantine落去. 成為我五號屋特別甜品.
沒有留言:
張貼留言