電飯煲拑錯制點算?

September 13, 2014, Saturday

今日出去買餸,  諗著叫Cindy試吓自已煮, 我晏的先出, 食飯時間先返.  哈哈, 不過佢真係唔得, 連煎豬扒, 蒸水蛋咁簡單都話唔得, 我返到嚟, 佢仲傻吓傻吓咁望著我.

最攪笑係佢話電飯煲壞咗煮唔到飯.  我去睇吓, 綠燈著咗, 原來佢按錯咗個保溫制, 用保溫點煮飯, 又唔識停咗重新再按.  用電飯煲, 最少都要40分鐘, 而家先煮, 真係有排先有得食.

我立即攞個Berdes出嚟, 用明火煮, 煮10分鐘, 焗10分鐘就得.

煮落飯先整餸, 時間就配合得好.

易潔鍋煎豬扒

用個鑊烚韮菜花

再用個蒸爐蒸水蛋, 耐無整落少咗水份, 唔記得要1:1.5, 用咗1:1, 的蛋實咗的.

 

鹹菜胡椒排骨湯, 佢煲咗兩個鐘.

餸煮好, 的飯都得啦.

三餸一湯一飯, 好簡單又攪掂一餐.

睇嚟, 有排我都要自己餐餐落廚呀!  咁又無問題, 我唔怕煮, 淨係怕食完要洗. 而家有Cindy洗碗, 咁我煮都無問題啦.