醬油麴豬扒

September 2, 2012, Tuesday

之前自家製嘅醬油麴, 整好入咗雪櫃都未用過, 今日諗著整醬油麴豬扒, 煮個菜飯, 韮王炒蛋, 三個人食就啱啱好啦.

 

返工前攞樽醬油麴出嚟, 的米麴沉澱咗

 

先用匙羹拌勻

拍鬆咗兩件豬扒

每塊用了兩大茶匙來醃, 即是用了四茶匙. 醃好放入雪櫃, 今晚返到屋企, 只要拿出來攤一陣就可以煎啦.

不過人算不如天算, 型爸四點幾打電話比我, 有個客人到咗, 佢要出去食飯.   跟著二公子又打比我, 今晚同朋友食飯...

吓, 咁我咪要一人前囉....唉, 無哂心機添...  女士通常肯煮, 都係為咗身邊嘅男士, 現在無對象, 真係連豬扒都唔想煎呀!

但唔煎唔得呀, 醃咗一日, 我驚太鹹, 都係煎咗佢啦.  煎好先再留起啦.

已經盡量掃哂的醬油麴, 但煎時唔可以大火, 好易燶呀!

我無食的肉呀, 只係剪咗兩嚿近骨嘅地方就夠啦.

食落味道一的都唔鹹, 的醬油麴好似無鹽麴咁入味呀!