東記上海麵炸豬扒

October 12, 2014, Sunday

今晚約咗林老闆食煲仔飯, 佢話佢出榮華鴛鴦腸+臘肉, 咁我無可能淨係出米.  一於去大埔墟街市買黑豚梅頭粒用嚟整煲仔飯.

咁去開大埔墟街市, 梗係走去食東記豬扒麵, 真係好耐無食過啦.  食完再去睇吓梁九記有咩野好買.

 
呢間東記上海麵, 最出名就係食炸豬扒同雞翼.  但星期六日午市去親都係好多人(唔做晚市架)


通常東記都搵唔到位, 我地就去隔離個檔口, 以前食粥架, 而家改咗叫城仔記小廚

 
咁呢道坐低叫杯野飲, 就可以叫隔離豬扒麵

 
但係一叫野飲, 嗰位小姐就會話一杯飲品都十幾文, 不如叫個多士套餐, 都係貴幾文, 有件多士食.  咁呢個情況, 都係會叫多士套餐 HK$17, 因為嗰碗豬扒麵, 最少要等20-30分鐘.

哈哈, 點解每件多士都咬咗一啖, 咪係我同型爸都咬咗一啖, 先記起影張相囉.

 
睇吓我地幾夾咀型態?  呢件奶醬多幾好味架.

 
呢份就係奶油多

  
 型爸要嘅豬扒雪菜幼麵, 呢碗麵先上, 而炸豬扒就要再等

 
我要嘅炸雞翼雲吞粗麵都嚟啦.  不過又係呢碗先上, 炸雞翼繼續等

哈哈, 到我地食到一半時, 的炸豬扒雞翼卒之到啦.   食落又幾好味嘅

以前賣HK$18, 跟著加到HK$22...HK$24, HK$26...而家係HK$28, 都抵食嘅

咁加埋多士飲品套餐, 每位HK$45...咁又攪掂一餐.

食完就去買餸, 又要去梁九記放低的錢啦.