亞宝麻辣湯麵

October 14, 2014, Tuesday afternoon

上星期同慢麼麼同事去亞宝食午市套餐, 麻煩鬼同事未嚟過, 今日同佢嚟食麻辣湯麵. 

上次唔使點等位, 但今日好多人要等呀!

等位時先見到呢張易拉架, 原來阿寶係男士, 上次金剛同小儀PK賽介紹以過架.

咦!今日專誠嚟食麵, 睇吓個牌, 咦, 有的唔同咗,  的餸變成平均價, 每款HK$6, 有飲品送, 柚子青檸梳.

呢張係上次影嘅點麵單, 的餸分三個價錢, HK$5, 6, 7, 現在統一, 全部HK$6.

叫咗麵, 青檸梳打冰就好快到

但嗰碗麵等咗成三十分鐘先到.

嗰款八餸(無麵)真係搵笨, 的餸每樣得一件, 份量好少, 要 HK$42.  雖然呢碗係食食吓先影, 但送到嚟都係差唔多.   最差係點咗的餸唔齊, 要追先再補比我地.

我地另外再叫了一碗淨麵加底, 諗著一個叫麵, 一個叫餸, 同麻煩鬼share嚟食, 點知碗麵嘅份量好少, 比起三哥的米線, 一半都無, 真係唔知有無加底. 但呢樣連問都無得問, 真係唔知點樣界定有加底定無加底.

唔止我地點咗的配料無,  其他檯都有咁嘅情況, 都係要佢地補番, 真係混亂過混亂.

呢道的麻辣湯底ok, 但份量就好細, 如果同譚仔相比, 譚仔嗰碗男仔都食得飽, 但呢碗就一定唔得啦.

我仲聽到其他食客講, HK$6一款餸, 的餸咁少嘅?  睇嚟下次嚟都係食午市套飯好的.   要食麵麵, 去譚仔或譚仔三哥啦.

其真呢道的麻辣係得架.  遲咗幾日型爸嚟搵我食午飯, 我同佢再嚟.

要咗一款唔辣嘅排骨蒸豆卜

一客水煮魚客飯.  的魚係鲩魚片, 多骨咗的, 但的麻辣真係勁, 食到出汗呀!

有心情食辣野時會再嚟呀!