2014年8月11日 星期一

放題達人

August 5, 2014, Tuesday afternoon

今日出去食午飯, 諗著近近地去美心快餐, 都有幾個月未去過.    點知去到排哂長龍, 仲係兩條龍.   買票要排隊, 攞食物要排隊, 跟著仲要等位, 梗係唔制啦.     哈哈, 咁即係叫我地唔使幫襯啦.

諗著撤退, 去寶勒巷嗰邊食啦.   行幾步有阿趙越車餐廳, 不過又有兩三檯人等位, 唔等啦.   再行..... 咦! 放題達人, 有位喎, 睇吓出面個牌的野啱唔啱食,  三個人商量下, 都可揀到啱食午餐, 咁就入去試吓啦.

 
呢間放題達人响文華中心一樓有兩間鋪, 我地行快一步, 即時有位.  但幾分鐘後就坐到滿哂啦.


咦, 落單呢部機, 同板長一樣, 同一個落單系統, 咁問佢地係咪同一集團.  佢地話係, 到我問去咁點樣scan個code, 睇來睇去部機無呢個function 嘅.  諗著scan咗有九折(即可免加一麻).    佢立即又話唔係, 無呢個function, 同一集團大家分開.   又話係又唔係, 咁即係係定唔係? 其實有無只需講聲, 都無所謂, 但何需反反覆覆, 咦咦哦哦.   點完之後我上板長個網, 佢地個集團入面咁多間, 無一間叫放題達人喎.

 每人點了一份餐

 清清地嘅麵豉湯, ok嘅.   不過佢地的員工, 可能接受了指令, 客人食完的碗碟要即時收起.  但咁樣比咗的壓力客人, 我地一打開個碗想飲湯,  已經馬上收碗蓋.  一飲完碗湯, 馬上又嚟收起隻碗.

落單都唔使兩分鐘, 麻煩鬼同事要的咖哩豬扒飯即到.  雖然係預早整定, 但送到嚟係熱辣辣.  不過佢話的豬扒麻麻地.   預咗啦, 的吉列豬扒淋上咖哩汁, 的吉列面都變腍啦.  所以我通常都唔會叫.

 慢麼麼同事要了鰻魚炒飯, 睇落去炒得好濕.  但慢麼麼同事話ok, 佢唔鍾意的飯太乾.

 我要了溫泉蛋和味牛肉飯, 嚟到熱辣辣.

馬上趁熱拌勻 (發出滋滋聲, 個碗好夠熱), 好彩的飯唔係太多, 都係餸多飯少, 啱我.  拌勻之後的飯變得好濕(因為溫泉蛋嘅關係). 但味道都幾好.

 我地三個分別要咗唔同價錢嘅午餐.  加一小帳後, 每人要五十幾至六十幾.

食日本野呢道附近有好多選擇.  但聽麻煩鬼同事的口條, 唔知係咪佢份豬扒飯麻麻, 好似唔想再嚟.   呢道我又唔係覺得好好, 但都唔太差, 我無所謂, 久唔久嚟食一次都得嘅.

沒有留言:

張貼留言