Loki 病了

August 14, 2014, Thursday

我病了, 點知Loki又病了.   狗就好似小朋友一樣, 無事紮紮跳, 有事就悶悶不樂, 唔想食野.  佢其中一隻腳有問題, 腫咗紅哂, 又成日透大氣, 打"乞次".  無哂心機, 個樣唔開心.  跟著睇吓張佢張病歷, 唉吔, 唔記得同佢打心絲蟲針, 唔會中招呀?

本來想同佢去附近搵個獸醫睇吓, 點知要book到明天晚上七點, 型爸點忍心呀, 馬上打電話去上環以前睇開嗰間鬼佬獸醫診所, 咁啱十二點半有一個位可jam入, 幾遠型爸都去啦.   結果由新界北開車去尖沙咀接我, 再去上環, 真係隧道費都唔少野(型爸唔想塞車, 仲要過西隧)

醫生話Loki唔知對某些野敏感, 肺部有的感染. 要食藥打針, 腳腫又要用消炎藥水洗, 搽藥膏.  驗埋心絲蟲, 好彩無事.  不過型爸個荷包有就事啦.

攪一攪就二千幾文, 仲貴過我睇專科醫生.   遲的仲要覆診呀!  我地未帶Loki去過其他獸醫診所, 收養佢以前, 嗰間外藉人士主理的機構, 都係帶Loki睇開呢間診所, 咁唔覺唔覺都嚟呢道睇咗兩年.  唔知係咪睇鬼佬醫生貴的呢.  又或者其他獸醫都係收咁貴呢?

離開時見到, 原來IPC++Foodlab中環店响呢道.

 

我食消炎藥, Loki又要食消炎藥.

我病Loki又病, 加上Ruby今天放假, 辛苦了型爸.  見到Loki無精打采, 又擔心又心痛呀!

晚餐都係出去食, 今次早了十幾分鐘出去, 去到小廚滋味 仲有一張檯.


我們各自叫一款晚餐, 呢款腐竹菜遠什菌啱我呀!  (雖然我食咩都係心機, 個胃折磨得我好辛苦)


型爸要了茄子火腩煲

二公子要了風沙魚塊.  三款小菜都好好味呀!


每人跟一碗飯, 我要三份一得啦, 無咩心機食.

我跟型爸分別要了好立克跟熱檸水.

二公子要了凍好立克.

呢道的晚餐真係好抵食, 五十幾文一客, 有例湯, 小菜一款 加飲品.   的小菜即炒又好味,  埋單都唔使一百六十文.   唔怪得之咁多人幫襯, 我見好多兩夫婦嚟食, 可能平過買餸煮餐飯.

上午花咗咁多Loki醫藥費, 晚餐慳的, 哈哈哈.