蟹味館

August 4, 2014, Monday

今日約咗朋友食飯, 唔知去邊道食好.   諗無可諗, 不如去Food Gallery啦, 有不同選擇, 想食咩都得啦.

去到門口, 咦! 入面好多人喎,  咁真係要恭喜佢地, 卒之做到咁多人流.  見到仲有一兩張檯, 快的入去坐低先, 朋友落到嚟, 自然會見到我.

當我坐低, 發覺有的唔同咗, 無咗售票counter, 有的檔口招牌無咗....

跟著女侍應攞張紙嚟話呢道改咗飲茶....吓, 飲茶.   原來係Food court 己經做唔著, 應該係頂咗手比另一間.   睇吓張紙上面, 鋪名叫蟹味館.

 已經約咗朋友嚟, 咁是但啦, 試吓都好嘅.  . 

再睇吓有的咩野食, 見到的價公錢都唔平, 小食要四五十文, 一碗紅豆沙要二十八文.   跟昔著小姐話而家做緊promotion, 埋單時全單六五折.    平貴唔係問題, 最緊要係好唔好食, 當然有得打折, 就會覺得抵食的啦.

再睇真的張紙, 無粉麵飯, 無飽點...  吓, 剩係食點心?  我地女士無問題, 唔知的男士點食得飽呢!

坐低開了茶, 馬上 點了五款點心.


佢地跟手比咗張落單紙, 放低行咗去.    我睇吓, 要咗五個點,  點解得四樣點心...問佢地啦, 佢話無义燒腸粉, 只有XO醬炒腸粉, 咁改XO炒腸粉無所謂.   個問題係無嗰款都要嚟話我地知麻, 如果我唔睇張紙, 咁咪要傻等.


蝦餃嚟啦, 需不是皮薄餡靚, 普普通通啦.

 
跟著另一位先生行埋嚟, 比一張改過嘅單, 吓, 又係得四樣點心.  不過今次佢有講, 唔好意思小姐, 無迷你填鴨包呀.... 有無攪錯, 又無, 咁都算, 我再叫多兩樣點心啦.

跟著加了兩款點心, 鯪魚球及珍珠雞, 改單時係13:36 分

 跟著XO醬炒腸粉嚟啦. 細細碟HK$38, 都無問題, 起碼有得食.

 十分鐘後, 鯪魚球嚟啦, 食落的魚好實, 唔好食嘅.

 咦, 加單嘅鯪魚球都嚟咗, 咁之前叫嘅點心都未嚟.  咁就叫的侍應追啦.

 追追追追, 一路都以為只有牛肉同珠雞未嚟.

我地等到兩點, 一樣都未嚟, 朋友趕著返公司有事要走先, 叫我等.  咁我都唔食啦.   叫佢埋單, 取消兩款點心.

食唔飽兼一肚氣啦.  返到公司坐低, 睇番的相, 咦, 我地只食了三個點心, 一路以為只有兩個點心未嚟, 原來潮州粉果都未嚟過, 仲比埋錢.....蝕呀!

呢間咁嘅餐廳(定係酒家??), 唔該未準備好就唔好做生意著啦.  一係當天無嘅野就先刪咗佢, 唔好等人叫就呢樣無嗰樣無.   無飯無粉麵無飽無蒸腸粉, 咁算係飲茶咩??

仲有, 開茶要了普洱, 的普洱有陣"巷"味, 飲咗一杯之後淨飲滾水.  的茶葉都唔合格呀!

越諗呢間越唔掂, 點比第二次機會呀?