牛一晚餐

August 17, 2014, Sunday, 牛一

今天係五號屋的牛一, 本來應該高高興興, 但食緊幽門螺旋菌嘅藥, 的藥令我個胃好唔舒服, 食野落去又痛, 唔食又痛, 真係咩野心機都無.   痛都無辦法, 點都要提起精神, 唔好令身邊的人擔心.

二公子今日好乖仔, 安排今天放假.  下午大家一齊去按摩, 晚上返屋企煮比我食.  哈哈, 我有的擔心架, 佢平時淨係識煮公仔麵, 咁大個仔都未試過煮野, 都唔知食唔食得.  本來型爸話同我去食黃油蟹, 但二公子唔鐘意食蟹, 再加上我個胃又唔舒服, 邊有心機出去食蟹.   二公子又好堅持佢煮, 咁又點可以唔接受佢心意.

 
有頭盤呀!  不過呢份唔係二公子煮, 係佢女朋友, 用麵包包起芝士腸仔, 沾蛋汁再上麵包糠炸起的流心芝士腸仔卷.   哈哈, 唔係好識控制的火, 第一件變非洲出品, 但跟著嗰兩三件就ok啦.

味道都唔錯, 入面真係流心架.   要番番個肚, 食半件啦.


二公子就開始整意粉, 佢真係一的都唔識架, 問我的醬汁點煮, 我教佢用奶, 牛油, 芝士整白汁.  再加佢買嘅白松露蒜蓉牛油落的汁.   我講比佢聽, 跟著由佢發揮啦.

 
 碟意粉整好啦, 哈哈, 佢唔識份量, 一次過整咗一大包意粉,   的白汁好香但就淡咗的, 因為我無講落鹽, 咁佢就無落鹽.  食時只要加的海鹽黑胡椒就得啦.

 

 跟著就係今晚嘅主打, 和牛晚餐啦.  初時佢想用煎pan煎, 最後佢都係話用電煎pan, 大家食著一齊煎, 溫馨的喎.

第一塊煎嘅就係最貴嗰塊赤毛和牛西冷啦.    肉質好腍,脂肪均勻, 入口好似即溶咁.  真係幾好味.  可惜我個胃口唔爭氣, 食咗一小塊都覺得好膩.

但佢兩仔爺食得好滋味, 跟著再煎一塊澳洲和牛西冷, 呢款澳洲和牛西冷的肉實的, 有牛味但當然無赤毛和牛咁好味.   跟著再煎一塊日本西冷, 再一塊澳洲和牛肉眼.  最後兩塊, 我真係只食了一啖, 無法再吃,  留番佢地慢慢欣賞的牛肉啦.

我本來都唔知的牛肉幾多公錢, 到最後佢地逐塊對吓的價錢睇吓邊款牛肉好味的, 咁我就知阿仔今餐花咗幾多錢嘞

嗰塊赤毛和牛要五百幾, 日本國產牛西冷扒都要二百九十.  最平兩塊澳洲和牛都要百幾文一塊.  哈哈, 阿仔對阿媽一的都唔孤寒喎.   呢餐用咗佢千幾文呀!

食完我仲有生日禮物收呀!

其實食咩都唔緊要, 亦都唔係平與貴的問題, 二公子肯花心思, 去買去煮, 我已經開心到不得了啦.

至於型爸提議的黃油蟹餐, 佢話會飛咗二公子, 我地兩個出去撐檯腳食呀! (等我個胃好番的先啦)

大公子的女朋友响facebook祝我生日快樂, 希望佢地明年儲到假期, 可以兩個一齊返嚟同我慶祝生日啦.