2015年8月11日 星期二

二泰妹泰國菜館

August 6, 2015, Thursday

今日星期四, Cindy話要匯錢返屋企, 改咗今日放假.   星期四我唔想煮喎, 等埋二公子放工, 一齊出去食.

本來諗著去上水御八築地, 去到有條長龍, 都攞飛仔等啦, 侍應小姐話十張檯, 大約半個鐘啦.  咁既然要等就行前的睇吓有無其他食肆, 見到另一間前面都有人等喎, 咁去睇吓, 呢道要得4張檯.  兩邊都等, 御八築地好似快的, 侍應小姐叫我地唔好行開, 仲比張餐單單點定野食.  到劃餐單, 吓, 大部份係壽司, 其他野食都麻麻喎, 咁我返轉頭去另一間睇吓, 前面三張檯入哂, 下一張輪到我地, 執緊檯比我...即刻打比型爸同二公子, 叫佢地過嚟, 嗰邊仲要等一張檯, 呢邊就可以入座啦.   況且, 我想食泰菜多的呀!


就係呢間二泰妹泰國菜館呀!  我好鍾意菜牌中間個小妹妹張相呀, 好可愛

 餐館入面都有貼咗, 餐牌都有, 唔通呢個就係二泰妹

 我地坐落都未叫野, 疑似老闆的男士就送咗碟甜品比我地...哈哈, 肚餓, 做前菜啦.

呢道有二人套餐, HK$288, 四人套餐HK$588, 但我地三人, 都係散叫啦.
 
 
 蒜蓉炒椰菜苗

 
 肉鬆生菜包

 
 蝦醬炒飯

 
 泰式生蝦 HK$92, 份生蝦放得好靚, 一面仲有冰, 咁樣上碟, 見到都開心的.

 
連埋蒜片辣椒, 醮的汁, 好味...但食埋粒辣椒, 好辣呀!

  
 型爸要了一枝啤酒, 我要了鹹檸七, 點知的鹹檸都無味嘅, 飲落都只係七喜的味.

 細冬蔭公湯, 足夠三人飲, 味道略嫌唔夠酸辣, 偏甜.  但夠濃都ok架.

 
一碟遲來了的炸芝士蝦棗, 哈哈, 送到嚟, 的蝦球又大又細, 證明係即整即炸啦....好熱呀.  不過無咩芝士味, 只有蝦球味, 即係平時炸蝦餅的味啦.

 
埋單都唔貴呀! HK$468, 三個人, 平均HK$156 一個人.   要套餐都係差唔多價錢.

我地覺得味道都唔錯, 下星期再嚟食.   到時要海南雞飯, 辣椒炒蟹配蒜蓉包, 明爐鱸魚...  哈哈, 咁快就諗定下星期食咩...
 

沒有留言:

張貼留言