大埔滘林徑 + 榮昌茶座

August 9, 2015, Sunday

星期日, 又到我地行山嘅日子.   今日組長太太回歸(佢同女兒由英國去歐洲玩咗兩星期, 加埋响英國同法國, 足足去咗一個月呀!)), 組長話都係熱身行輕玨的, 大埔滘林徑啦.

我當然話好啦.   其實我上星期扭傷足踝, 到而家都仲有的腫痛.  不過我唔想休息繼續行山, 筋骨足踝呢的野, 無幾個月都唔會好架.   唔通幾個月都唔行咩.

組長太太話去旅行, 瘦咗七八磅, 旅行期間, 日日都行.  初時叫我地錫著佢, 但佢同組長一枝箭响前面, 反而我呢個傷兵就大墜後啦.

行完紅藍徑, 我地又商量去邊道食.  上星期去大埔陳漢記, 大家都唔係好like, 最終決定去榮昌茶座啦.

去到即時有位, 少咗的人喎.   跟著比的餐牌我地.....餐牌改哂加哂價.  跟著再發現, 現在有假日餐牌...即係星期日唔同價錢....有無攪錯, 茶檔啫, 做響咗使唔使咁呀! 即係叫人假日唔好嚟食啦.

豬扒米HK$40, 餐飲要另叫

咖哩牛腩飯 HK$55, 組長同另一位組員話的牛腩鹹到死, 應該係隔夜嘅, 一的都唔好食.  以前咖哩牛腩飯係午餐, 包飲品(大約HK$40).   而家變假日碟頭飯, HK$55但無飲品.

綠茶雪糕紅豆冰, HK$34

BB鴿 HK$184 四隻, 即HK$46一隻.  之前HK$40一隻.

 
型爸要了梅菜扣肉飯 HK$50, 不包飲品 (以前大約HK$40一個餐包飲品).  佢話梅菜無味, 最難食係的扣肉, 好似柴皮.    型爸比一嚿我試吓, 又真係幾難食, 有色無味, 的肉嚡到似柴皮.

我要了鮮茄牛肉飯HK$50, 的鮮茄酸酸地我覺得ok, 但的牛肉就無咩味啦.  以前係餐包飲品, 現在係假日碟頭飯加咗價仲唔包飲品.

只有碎蛋牛角包係餐, HK$40

8個人食咗HK$735, 每位HK$92.   我地覺得貴咗好多.

本來貴咗無問題, 最緊要係的食物好唔好食.    香港地, 如果的野好食, 貴一貴都有人排隊.  加咗假的食物質數又差咗.  哈哈, 即係趕客, 唔怪得之今日少咗人啦.   無人等位兼有好多吉位添.

我地下次行完山, 呢道唔會再係我地考慮餐廳之一囉.