2015年8月10日 星期一

Quay Side Cafe - 文華中心

August 3, 2015, Monday

昨天行山隻左腳踝"拗柴",  今早一睇, 腳踝青青瘀瘀腫起咗.  我已經搽咗counter pain, 隻腳踏落地, 腳踝有的隱隱作痛,  行路要就著就著.

咁食晏時, 麻煩鬼話唔好行咁遠啦, 去海鮮站啦(我無話佢知我星期六先食完), 不過唔係你話去就有位, 海鮮站大排長龍.  唔排啦, 上去1樓睇吓有咩野食.

見到有間cafe, 又有位, 咁就入去啦.

睇張餐紙, 呢間叫Quay Side Cafe

今日午餐.... 我同麻煩鬼都想要C, 焗香草海鮮扁意粉, 點知佢地話意粉只剩一份.  咁我唔要讓麻煩鬼啦.  麻煩鬼唔食牛肉, 唔鍾意食飯, 無咩選擇, 我轉D餐食牛扒.

呢間cafe晚上係酒吧, 坐落好大陣煙味, 老闆唔知係咪聽到我講, 馬上開大的冷氣.

呢道有三座飛驃機....晚上應該人客多的吧, 但午市到一點半都仲有空位

呢道以open kitchen形式,睇落非常雜亂,個廚房及吧檯,佔了整個餐廳四成,所以整間餐廳都只有十幾張檯。

 
今日餐湯,南瓜忌廉湯配蒜蓉包,的麵包烘完都係硬的,個忌廉湯飲落似糊仔, 唔like呀.   哈哈, 麻煩鬼飲兩啖仲唔飲添, 佢話的味怪怪地.

慢麼麼要了節瓜肉排飯HK$46,其實係豬扒嚟架, 佢話味道ok啦

麻煩鬼碟焗意粉HK$52, 我見到呆一呆, 咁樣嘅.  再問麻煩鬼好唔好味, 佢叫我自己試吓....好彩佢得一份啫, 真係唔啱我口味, 的扁意粉好腍.

我份紅酒汁牛扒配薯菜最後先到.   試吓的紅酒汁....真係唔得, 味道唔啱口味, 的汁太稠, 我要掃哂的汁, 淨食牛扒.  至於塊牛扒我又覺得ok喎, 唔韌, 幾十文, 想食咩.

侍應問我餐飲要咩, 我問係咪即蘑咖啡, 位侍應話咖啡機壞咗, 現在係即溶咖啡...吓, Cafe最重要係部咖啡機喎, 唔係點叫Cafe 呀!   要杯好立克算啦.

香港人對於食係好精明, 平平貴貴都好, 好味的話排隊都要等.   所以下次見到一間排哂隊, 另一間一入去就有位, 當然係有的原因嘅.  

呢間唔會係我的午市飯堂之一囉.

沒有留言:

張貼留言