富臨百日宴

August 8, 2015, Saturday

今日姪女的兒子(即係我姪孫....輩份好大呀!)攪百日宴, 擺番幾圍, 在香港的家人齊齊出席.   講開又講, 擺百日宴真係好過擺滿月酒.  滿月時, BB仲係一團小麵粉, 無咩反應, 但三個月嘅人仔就精伶可愛.  做媽媽嘅又修咗的身, 身體復原得好的, 見人都精神的啦.

我和型爸先去青衣, 接咗媽媽, 再去元朗富臨皇宮, 真係行咗個大運先到.   無法啦, 只有我地有車, 型爸話係我媽媽, 幾遠都要接呀!

去到七點幾, 有薑醋食, 又食西餅, 點食得咁多呀, 一陣仲有好多野食喎.

 先嚟紅雞蛋, 而家的紅雞蛋已經唔用染色嘅方法啦, 用紅色玻璃紙包著, 我覺得咁樣衛生的呀!

 
 先嚟乳豬, 第一碟個個肚餓, 通常都食得快的.

跟著係龍蝦伊麵, 佢地個個爭著食伊麵, 但我只可食兩口, 食得多就會胃痛.  哈哈, 我專食龍蝦得啦. 幾好味呀!

炸蟹拑, 仲有西芹帶子貴妃蚌

魚翅, 咦, 係真翅唔係仿翅喎

清蒸海班, 條魚蒸得好滑喎

鮑魚扒冬菰, 的鮑魚唔係好夠腍呀.  呢碟開始已經食剩一半

炸子雞只食了一兩件

 
乾燒伊麵要包走

 
炒飯都係要包走

 

紅豆沙同水果就要即時食啦.

講真, 呢間富臨的野都煮得好幾味喎.

今日又比咗個機會我地影家庭大合照, 放上家人的群組, 在國外嘅家人都見到, 大家都好開心呀!

科技發達, 令身在外地嘅家人雖未能出席, 都可以分享我地嘅快樂.